Ова е прв генерален штрајк во последните 14 години заеднички поддржан од двата најголеми синдикати во Шпанија, како и од други работнички организации и здруженија на станари, кои се револтирани поради порастот на кириите и присилните иселувања
Повеќе од милион работници во Шпанија денеска се очекува да излезат на генерален штрајк, барајќи владата да ја реши огромната криза со домувањето во земјата. Првиот генерален штрајк во Шпанија по 14 години се одржува три недели пред парламентарните избори.
Ова е прв генерален штрајк во последните 14 години заеднички поддржан од двата најголеми синдикати во Шпанија, како и од други работнички организации и здруженија на станари, кои се револтирани поради порастот на кириите и присилните иселувања.
„Нема да запреме сè додека целосно не го трансформираме моделот на домување во оваа земја, така што домовите ќе служат за живеење, наместо да бидат во служба на малцинството што живее од кирии“,
изјави Алисија дел Рио, портпарол на Синдикатот на станари во Мадрид.
Денеска во Шпанија се очекуваат доцнења во јавниот превоз, како и масовни затворања на продавници, фабрики и други бизниси.
Во првите часови од штрајкот беа регистрирани помали инциденти. Работниците почнаа да се собираат на полноќ.
Од почетокот на штрајкот на полноќ, според соопштение од синдикатите, околу 90 проценти од автомобилската и пристанишната индустрија, 85 проценти од преработувачите на месо и 75 проценти од енергетскиот сектор ја прекинале работата.
Работниците, активистите, политичарите и граѓаните имаат различни интереси во денешниот прекин на работата, но големиот проблем за речиси сите нив е многу високата цена на домувањето, при што просечната кирија во Шпанија е речиси двојно зголемена во изминатите 10 години.
Штрајкот доаѓа по неколкунеделни демонстрации и поставување шатори, предизвикани од присилното иселување и последователната смрт на 87-годишна жена во Мадрид.
Владата за порастот на кириите и недоволната понуда на станови главно ја обвинува десничарската опозиција, која управува со многу региони и општини.