На денешната седница, членовите на Советот, исто така, донесоа одлука досегашниот шеф на ОЈО ГОКК, Ислам Абази, чиј мандат истекува, да биде распореден во Вишото јавно обвинителство (ВЈО) Гостивар. Всушност, со одлуката Абази се враќа во ВЈО Гостивар од каде што дојде откако беше избран за шеф на ОЈО ГОКК во 2022 година. Одлуката за распоредувањето на Абази, исто така, ќе стапи во сила на 14 ноември
Советот на јавните обвинители на денешната седница едногласно донесе одлука за именување на Искра Хаџи Василева за нов шеф на Основното јавно обвинителство за гонење на организираниот криминал и корупцијата.
Станува збор за формално одлука на Советот откако Хаџи Василева за шефица на ОЈО ГОКК беше избрана на непосредни избори што се одржаа на 28 октомври и на кои гласаа обвинители од јавните обвинителства во целата држава.
Како што констатира претседателот на Советот на јавните обвинителите Башким Бесими, одлуката за именување на Хаџи Василева ќе објавена во „Службен весник“, а ќе стапи во сила на 14 ноември бидејќи во меѓувреме треба да истечен мандатот на актуелниот шеф на ОЈО ГОКК, Ислам Абази.
На денешната седница, членовите на Советот, исто така, донесоа одлука Абази да биде распореден во Вишото јавно обвинителство (ВЈО) Гостивар. Всушност, со одлуката Абази се враќа во ВЈО Гостивар од каде што дојде откако беше избран за шеф на ОЈО ГОКК во 2022 година. Одлуката за распоредувањето на Абази, исто така, ќе стапи во сила на 14 ноември.
Пред гласањето по двете точки од дневниот ред, претседателот на Комисијата на Советот на јавните обвинители што ги спроведе изборите, Ермон Незири, се осврна на текот на постапката, за која рече дека била транспарентна и поминала во најдобар ред.
„Биографиите на кандидатите беа објавени на веб-страницата на Советот, тие ги претставија своите програми, а денот на гласање беше 28 октомври. Од запишаните 187 јавни обвинители, на непосредните избори за шеф на ОЈО ГОКК гласаа 175 обвинители, имаше само четири неважечки гласачки ливчиња, и немаше никакви забелешки за текот на гласањето од избирачките одбори. На 29 октомври Советот ги објави конечните резултати, со што констатира дека Искра Хаџи Василева и избрана за јавен обвинител на Основното јавно обвинителство за гонење организиран криминал и корупција“,
рече Незири.
На изборите Хаџи Василева доби вкупно 64 гласа, а зад неа со 57 гласа беше обвинителот од ВЈО Скопје, Трајче Пеливанов. Кандидатот Јован Цветановски од ВЈО Скопје доби поддршка од 30 колеги, додека Фатон Азизи од ОЈО ГОКК заврши со 14 гласа. Најмалку гласови од своите колеги доби обвинителката Лидија Раичевиќ од ОЈО Скопје – 6 гласа.
Новоизбраната шефица на Основното јавно обвинителство за гонење организиран криминал и корупција (ОЈО ГОКК), која има 11-годишно искуство како обвинител,. неодамна во изјава медиумите кажа оти е убедена дека ќе остане имуна на притисоците на кои, како што вели, е природно обвинителската работа да биде изложена.
Прашана како би постапила доколку ѝ се јави носител на висока државна функција, меѓу кои и премиерот, таа рече дека институционалната комуникација е нормална, но не и евентуалните интервенции во конкретни предмети.
„Видете, органите, државните институции не е ништо спорно да соработуваат и тоа е веројатно дел од нешто што е исто така природно, логично, разумно и нешто што се случува секаде. Ако мислите на некакви интервенции или ургенции, тоа е веќе друго прашање. Се разбира дека ние на крајот на денот според Уставот сме самостојни и одлучуваме врз основа на право, факти и докази“,
изјави Хаџи Василева во понеделникот (3 ноември).