Од шалтерите во филијалата на Алта банка во Битола, која ќе работи и во сабота, граѓаните ќе може да подигнат до 20 000 денари. Овој износ, како што појаснуваат од Народната банка, е максималниот дозволен износ за повлекување во период од две недели
Граѓаните кои имаат сметки во Алта банка АД Битола, а немаат платежни картички, од утре (5 ноември) ќе можат да подигнат средства од шалтерите во главната филијала на банката во Битола – објави денеска Народната банка.
Од шалтерите, кои ќе бидат наменети исклучиво за подигање готовина, без можност за други трансакции, граѓаните ќе може да подигнат до 20 000 денари. Овој износ, како што појаснуваат од Народната банка, е максималниот дозволен износ за повлекување во период од две недели.
„Ќе бидат отворени повеќе шалтери на адресата ул. ‘Добривое Радосављевиќ’ бр. 21 во Битола. Исплатата ќе биде достапна за граѓаните, а особено за пензионерите и примателите на социјална помош, кои средствата ги добиваат преку платежни сметки во банката, но немаат платежни картички. Од 6 ноември, вклучително и сабота, 7 ноември, филијалата ќе работи во две смени, со цел да се опслужат што поголем број клиенти“,
соопштија од НБРСМ.
Исплатата ќе се одвива во повеќе денови, според однапред утврден распоред, за кој граѓаните ќе бидат известени преку СМС-порака со точен датум и час кога треба да дојдат во филијалата. До граѓаните се апелира да ги почитуваат термините за да се избегнат гужви и подолги задржувања во банката, а за оние што нема да можат да дојдат во предвидениот период, ќе бидат обезбедени дополнителни термини.
Според најавите на Народната банка, се подготвува отворање на шалтерите за пензионерите и примателите на социјална помош и во други градови во земјата.