Во барањата до институциите, од „Маргини“ бараат враќање на содржините за сексуалната различност и хомофобијата, како и на отстранетите содржини за родова еднаквост и сексуални и репродуктивни права. Се бара да бидат објавени стручните мислења врз основа на кои се направени измените. Бараат и воведување механизми за пријавување и заштита од хомофобично и трансфобично насилство во училиштата, како и вклучување на младите и организациите што ги застапуваат нивните права во креирањето на образовните политики
Коалицијата „Маргини“ остро реагира на отстранувањето на дел од содржините од наставната програма за Сеопфатно сексуално образование, која по претрпените измени е преименувана во Здравје и заштита на здравјето. Невладината организација оценува дека бришењето на поимот „род“, отстранувањето на содржините за сексуалната различност, хомофобијата, родовата еднаквост и сексуалните и репродуктивните права претставува уште еден удар врз родовата еднаквост и правата на ЛГБТИ-луѓето.
Оттаму бараат Министерството за образование и наука да даде јавно објаснување врз основа на кои стручни сознанија е направена оваа измена и како таа придонесува за целите на образованието.
„Со отстранувањето на оспоруваните содржини, Министерството за образование и наука ја зацврстува моќта на антиродовите актери да определуваат чии искуства смеат да бидат именувани во образованието. Цената на ваквото повлекување ја плаќаат младите чии права и безбедност веќе се загрозени. Јавното негодување против нивната рамноправност не смее да стане критериум за наставните програми“,
велат од Коалиција „Маргини“.
Во оваа смисла, оттаму укажуваат дека училиштата сè уште не се безбедна средина за сите ученици. Според податоците што ги посочуваат, речиси 37 отсто од учениците пријавиле дека во нивното училиште се случило врсничко насилство врз основа на сексуална ориентација или родов идентитет. Дополнително посочуваат дека 63 отсто од ЛГБТИ учениците во земјава го кријат својот идентитет на училиште, а 61 отсто од испитаниците изјавиле дека ЛГБТИ прашањата никогаш не биле опфатени во нивното образование.
Според истражувањето „Опасност од (не)постоење“ на Коалицијата, за периодот од 2021 до 2023 година утврдени се 255 случаи на институционално насилство врз ЛГБТИ+ лица, од кои 82 во образованието
„Овие податоци бараат јасна образовна политика за спречување на хомофобијата и заштита на младите, а МОН одговара со отстранување на нејзиното експлицитно изучување и со тоа ја ослабува програмската обврска да се препознаваат и оспоруваат предрасудите што го овозможуваат насилството“,
велат од Коалицијата.
Нагласуваат дека ЛГБТИ младите имаат право на слободен живот, еднакви можности и безбедно образование, без страв од дискриминација и насилство. Во оваа смисла, ги повикаа да се спротистават на политиките што ја ограничуваат нивната слобода и ја прават еднаквоста предмет на, како што велат, политичко пазарање.
Во барањата до институциите, од „Маргини“ бараат враќање на содржините за сексуалната различност и хомофобијата, како и на отстранетите содржини за родова еднаквост и сексуални и репродуктивни права. Се бара да бидат објавени стручните мислења врз основа на кои се направени измените. Бараат воведување механизми за пријавување и заштита од хомофобично и трансфобично насилство во училиштата, како и вклучување на младите и организациите што ги застапуваат нивните права во креирањето на образовните политики.