Од Институтот за јавно здравје повикаа граѓаните да го проверат својот вакцинален статус во најблискиот вакцинален пункт и да ги надополнат пропуштените дози на вакцината МРП
Институтот за јавно здравје (ИЈЗ) апелира граѓаните да го проверат својот и вакциналниот статус на своите деца и да ги надоместат пропуштените дози од вакцината МРП против мали сипаници, рубеола и паротит. Апелот доаѓа во момент кога во дел од соседните земји се регистрирани случаи на мали сипаници.
„Имајќи го предвид сè уште недоволниот опфат со МРП-вакцината во нашата земја, како и актуелната епидемиолошка состојба и регистрираните случаи на мали сипаници во дел од соседните земји, потребна е зголемена претпазливост и навремено преземање превентивни мерки“,
велат од ИЈЗ.
Оттаму ја посочуваат вакцинацијата како најефикасна мерка за заштита од мали сипаници и спречување нивно ширење. Особено важно, додаваат од ИЈЗ, е децата да ги примат двете дози на МРП-вакцината, а лицата кои ја пропуштиле вакцинацијата да го проверат својот вакцинален статус и да ја надоместат пропуштената доза.