Пратеникот на СДСМ, Митко Трајчулески, во прашањето потсети на претходните случаи на злоупотреба на безбедносниот апарат во државата, меѓу кои и скандалот со незаконското прислушување, при што оцени дека тие покажале колку е важен ефективниот надзор врз работата на службите
Премиерот Христијан Мицкоски ги отфрли сомнежите дека обединувањето би можело да доведе до нови случаи на незаконско прислушување. Како аргумент ја посочи постојната Оперативно-техничка агенција (ОТА), како и механизмите за одговорност при евентуално кршење на законот
Владата останува на планот за обединување на Агенцијата за национална безбедност (АНБ) и Агенцијата за разузнавање (АР). Процесот ќе се одвива транспарентно, со јавна дебата и со засилен парламентарен надзор. Ова денеска го изјави премиерот Христијан Мицкоски од собраниската говорница, а одговарајќи на прашање поставено од пратеникот на Социјалдемократскиот сојуз (СДСМ), Митко Трајчулески, во кое побара Владата да се откаже од планираното спојување на двете агенции и предупреди дека тоа може да доведе до прекумерна концентрација на безбедносна моќ.
Премиерот посочи дека спојувањето на двете служби е предвидено во изборната програма на ВМРО-ДПМНЕ и дека подготовките се одвиваат во координација со надлежните институции и стратегиските партнери на државата.
Една од целите на реформата, како што рече, е да се обезбеди поефикасно функционирање на безбедносните служби, со соодветни механизми за контрола и заштита од злоупотреби.
Најави јавна дебата и додаде дека Собранието ќе има клучна улога во надзорот врз работата на идната обединета агенција.
„Точно е дека оваа влада планира да направи реформа во начинот на кој што функционираат службите. Прво затоа што кога бевме во опозиција бевме жртви на тие служби и за тоа има судски процеси, ќе видиме како ќе завршат. Не се тие се уште во фаза во којашто можеме да коментираме. Ќе видиме како сето тоа ќе заврши. И тоа нема да биде доколку почне процес којшто ќе биде скриен, напротив, ќе биде транспарентен процеској што ќе има јавна дебата онолку колку што е потребно, за да искатализираме решение коешто ќе обезбеди транспарентност, односно контрола од овде од парламентот којшто ќе ја контролира работата на таа една единствена обединета агенција и она коешто е најважно, коешто ќе обезбеди добивање информации со цел заштита на суверенитетот и демократскиот капацитет на државата, да не биде злоупотребена“,
кажа Мицкоски.
Ги отфрли сомнежите дека обединувањето би можело да доведе до нови случаи на незаконско прислушување. Како аргумент ја посочи постојната Оперативно-техничка агенција (ОТА), како и механизмите за одговорност при евентуално кршење на законот.
„Тоа е невозможно затоа што имаме една друга институција која што се вика Оперативна техничка агенција. Така што и да некој едноставно ако зборуваме за нешто коешто е спротивно на законот, тоа е веќе злоупотреба и за тоа си има друг тип механизми и одговорност пред законот. Во услови на кривично дело за коишто се потребни посебни истражни мерки, имаме неколку процеси за коишто сега јас не би зборувал јавно, не сакам да го загрозувам процесот и на тој начин да ја правам ранлива државната безбедност. Но, како политичка партија излеговме на избори со програма и еден од проектите во таа програма е токму тоа обединување на агенциите по теркот на Соединетите Американски Држави, Хрватска и многубројни примери коишто ги има во Европа и меѓу нашите партнери во во рамките на НАТО“,
рече премиерот.
Пратеникот на СДСМ, Митко Трајчулески, потсети на претходните случаи на злоупотреба на безбедносниот апарат во државата, меѓу кои и скандалот со незаконското прислушување, при што оцени дека тие покажале колку е важен ефективниот надзор врз работата на службите.
„Ова прашање го поставувам со длабока загриженост затоа што Македонија не смее да си дозволи уште едно искуство во кое службите ќе станат инструмент на владејачката партија, а граѓаните ќе станат предмет на следење, притисок и заплашување. Нашата држава веќе ја плати цената на злоупотреба на безбедносниот апарат и тоа двапати во време на владеење на ВМРО-ДПМНЕ. Скандалот со незаконското прислушување покажа колку се опасни службите кога надзорот потфрла, а политичката моќ останува без ефективни ограничувања“,
кажа пратеникот.
Предупреди дека без соодветни ограничувања постои ризик безбедносните служби да се користат за партиски цели, а граѓаните да бидат изложени на следење, притисок и заплашување.
На истата собраниска седница пратеникот Трајчулески отвори и прашања за контролата на државните граници, посочувајќи ги бегствата на лица од земјата и случајот со петте тони дрога запленети во Србија. Побара од премиерот да објасни со кои конкретни резултати Владата гарантира дека институциите ефикасно ги контролираат границите и го штитат суверенитетот на државата.
Спојувањето на службите е дел од изборната програма на ВМРО-ДПМНЕ, а во негов прилог премиерот Христијан Мицкоски зборуваше уште во 2024 г.