„Во Брвеница е чудно како тоа славите пораз бидејќи кандидатот што вие го поддржавте изгуби. Кандидатот на ВМРО-ДПМНЕ и коалицијата освои близу три илјади гласа, а кандидатот на Националната алијанса за интеграција (НАИ) имаше околу 900 гласа помалку, што значи тој кандидат загуби на изборите“, рече премиерот
Граѓаните на Брвеница в недела ќе гласаат така како што им вели разумот, а вие ќе се јавите да ни честитате, рече премиерот Христијан Мицкоски одговарајќи на пратеничко прашање поставено од пратеникот Скендер Реџепи, кој на собраниската седница говореше за амбиентот пред вториот круг на локалните избори во Брвеница и рејтингот на владејачката партија.
Мицкоски во одговорот се осврна и на минатогодишните локални избори и рече дека тогаш граѓаните на Брвеница јасно се определиле и го дале гласот за кандидатот на ВМРО-ДПМНЕ, Јовица Илиевски, кој ненадејно почина пред неколку месеци.
Според Мицкоски, нивниот кандидат и на вонредните избори пред речиси две недели имал предност пред кандидатот на Националната алијанса за интеграција (НАИ).
„Во Брвеница е чудно како тоа славите пораз бидејќи кандидатот што вие го поддржавте изгуби. Кандидатот на ВМРО-ДПМНЕ и коалицијата освои близу три илјади гласа, а кандидатот на Националната алијанса за интеграција (НАИ) имаше околу 900 гласа помалку, што значи тој кандидат загуби на изборите“,
рече Мицкоски.
Тој додаде дека изминатите дваесет години, со претходната власт во Брвеница, не било направено ништо, а 10 000 лица од кои 90 отсто Албанци биле иселени.
„И сега одите по Европа и низ светот, коленичите и им викате вратете се во Брвеница да гласате затоа што не смеат кауриве да победат и да имаат свој градоначалник во Брвеница. Ги барате тие истите коишто избегаа заради вашето дваесетгодишно владеење во Владата“,
кажа Мицкоски.
Тој потсети на пораките што ги испраќал до граѓаните во Општина Брвеница да не се прават етнички поделби меѓу населението.
„Кога бев во Теново, видов два Божји храма, една џамија и една црква, една до друга. Таму ќе видите како верниците муслимани и православни христијани пред да влезат се ракуваат затоа што се соседи. Кога заврши првиот круг на предвремените локални избори, за жал предизвикани заради трагичен настан, односно прераната смрт на градоначалникот Јовица Илиевски, луѓе од коалицијата на НАИ излегоа и повикаа на етничко гласање, додека од ВМРО-ДПМНЕ никој не побара да се гласа етнички. Напротив, мојата порака беше, ќе сакаат да ве делат по етничка основа, но немојте тоа да го дозволите бидејќи вие повторно ќе бидете еден до друг“,
додаде тој.
Мицкоски рече дека на 2 ноември ќе чека честитки за нивната победа во Брвеница.