Трошоците за живот за македонските граѓаните од јануари досега се зголемени за 4 000 денари. Во октомври синдикалната минимална кошничка е над 70 000 денари, а со кирија за стан од 60 квадратни метри изнесува скоро 90 000 денари. Ниту три плати не се доволни да се покријат основните животни трошоци, велат од СДСМ и обвинуваат дека власта не ги прифатила мерките што тие ги предложиле на почетокот на кризата
Секој месец има нови поскапувања, а од наредната година се најавуваат и нови покачувања на струјата и парното – во Европа се предупредува на нов удар поради раст на трошоците за енергија и многу земји веќе преземаат мерки, само владата на Мицкоски не прави ништо, обвинуваат од СДСМ. Од опозициската партија обвинуваат и дека власта не ги воведе мерките што ги предложил СДСМ на почетокот на кризата.
„Трошоците за живот за македонските граѓаните од јануари до сега се зголемени за 4 000 денари. Во октомври синдикалната минимална кошничка е над 70 000 денари, а со кирија за стан од 60 квадратни метри изнесува скоро 90 000 денари. Ниту три плати не се доволни да се покријат основните животни трошоци. Македонскиот работникот работи цел месец, а платата не му стигнува да преживее затоа има најниска плата во Европа. Платите не ги следат поскапувањата. Стандардот е на ниво на една третина од стандардот во ЕУ. Не трета економија во Европа, туку една третина“,
кажа Маја Серафимовска-Борозан на денешната прес-конференција на СДСМ.
Економските истражувања, како што велат од СДСМ, покажуваат дека на Македонија ќе ѝ требаат 52 години за да го достигне просекот на Европската Унија во благосостојбата.
„Околу 180 000 работници земаат плати помали од 31 200 денари месечно, минималната плата не мрда од 26 илјади денари. Арамијата Мицкоски го донесе народот до раб на преживување. Ја одби секоја мерка на СДСМ за помош на граѓаните. Одби 600 евра минимална плата, ги одби мерките за заштита на животниот стандард. И во новиот ребаланс нема повисока минимална плата, нема 600 евра за работниците, нема мерки, нема помош за земјоделците. Има долгови, високи камати, а сметката ќе ја плаќаат граѓаните и идните генерации. За четири милијарди евра арамијата Мицкоски го зголеми долгот за само две години, колку половина од вкупниот долг во изминатите 30 години. Оваа сурова реалност е свесна одлука на арамијата Мицкоски – работниците да работат за малку пари и да бидат сиромашни. Арамиски ја троши државната каса. Трупа долг врз долг и прави ребаланс на ребалансот- не за граѓаните, туку за криминални партиски тендери“,
додава Серафимовска-Борозан.