Мицкоски рече дека нивниот кандидат Стојанчо Радически освоил огромно мнозинство гласови, а разликата во однос на освоените гласови од кандидатот на СДСМ, како што рече, е поголема од четири спрема еден
ВМРО-ДПМНЕ е убедливо прва и има огромна победа во првиот круг на изборите за избор на градоначалник во општина Брвеница. Ова вечерва го изјави премиерот и претседател на владејачката ВМРО-ДПМНЕ, Христијан Мицкоски соопштувајќи ги резултатите од денешните предвремени локални избори во Брвеница, според информациите со кои располага партијата.
Мицкоски рече дека нивниот кандидат Стојанчо Радически освоил огромно мнозинство гласови, а разликата во однос на освоените гласови од кандидатот на СДСМ, како што рече, е поголема од четири спрема еден.
„Честитки за граѓаните на Брвеница што се одважија и овозможија уште една голема победа пред сè за нив, а потоа и за Македонија, што е јасен показател дека народот е со ВМРО-ДПМНЕ и дека народот одбира прогрес, единство и исправна борба за иднината. Со оглед на тоа дека имаше повеќе кандидати во изборот за градоначалник, многу веројатно е дека ќе има втор изборен круг, каде што како фаворит влегува кандидатот на ВМРО-ДПМНЕ, со освоени околу 3 000 гласа, втор, според нашите анализи, е кандидатот на ДУИ, со нешто повеќе од 2 100 гласа, трет е кандидатот на Влен, односно Вреди, а четврт е кандидатот на СДС. Независниот кандидат којшто беше поддржан од политичката партија Левица освои околу педесетина гласови“,
рече Мицкоски.
Мицксоки изјави дека демократијата подразбира натпревар на различни идеи, програми и кандидати, но кога ќе заврши гласањето, останува една обврска која важи за сите – да се почитува волјата на граѓаните.
„И токму од таа волја произлегува политичката порака на денешните избори. Сакам да му честитам на нашиот кандидат, на сите кои работеа посветено во изминатите недели и, пред сè, на граѓаните коишто ни ја дадоа својата доверба. Оваа поддршка за нас има големо значење. Резултатот од денешните избори има и пошироко политичко значење. За нас, ова е уште една потврда дека граѓаните ја препознаваат и ја поддржуваат политиката што ја водат ВМРО-ДПМНЕ и Владата. Политиката на конкретни проекти, на исполнување на ветувањата и на преземање одговорност за преземените обврски. Оваа доверба за нас претставува дополнителен поттик да продолжиме уште посилно“,
рече Мицкоски.
Тој ја побара поддршката од граѓаните и на извесниот втор круг што треба да се одржи на први ноемрви.
Државната изборна комисија веќе објави првични резултати од гласањето. Според сто отсто обработени избирачки места, води кандидатот Стојанчо Радически од коалицијата „Твоја Македонија“ предводена од ВМРО-ДПМНЕ кој има 2 943 гласа, втор е кандидатот на „Национална алијанса за интеграција“ предводена од ДУИ, Аркин Јахиј со 2 152 гласа, терт е Јакуп Усеини од Влен со 1 528 освоени гласа, а следуваат Јовица Радески од коалицијата предводена од СДСМ со 706 и независните кандидати – Душан Богдановски со 55 и Арифе Идризи со 21 глас.