Од Кривичен велат дека по предлог на Основното јавно обвинителство, Судот му одредил мерки за претпазливост и тоа забрана за напуштање на живеалиштето односно престојувалиштето, обврска за повремено јавување во судот, забрана за приближување и остварување контакти со одредени лица
Мерката куќен притвор за второобвинетиот Артан Груби во случајот „Државна лотарија“ е укината по сила на законот, информираа денеска од Основниот кривичен суд Скопје.
Според судското соопштение, согласно член 470 од Законот за кривичната постапка (ЗКП), мерката притвор односно куќен притвор по поднесен обвинителен предлог не може да трае подолго од 60 дена. Имајќи предвид дека обвинителниот предлог бил поднесен на 13 август 2026 година, Кривичниот совет донел решение за нејзино укинување поради истекување на законскиот рок.
Од Кривичен велат дека по предлог на Основното јавно обвинителство, Судот му одредил мерки за претпазливост и тоа забрана за напуштање на живеалиштето односно престојувалиштето, обврска за повремено јавување во судот, забрана за приближување и остварување контакти со одредени лица.
Судот дополнително информира дека против обвинетиот и понатаму останува во сила мерката за одземање на патната исправа и забрана за издавање нова патна исправа или друг документ за преминување на државната граница.
Кривичниот совет го разгледал предлогот на одбраната за укинување на оваа мерка со понудена гаранција, но по добиено негативно мислење од надлежното јавно обвинителство, донел решение со кое барањето на одбраната е одбиено.
Артан Груби е обвинет во предметот „Државна лотарија“ за злоупотреба на службената положба и овластувањето, за кое е предвидена максимална казна од една до пет години затвор. Тој на судењето се изјасни за невин.
Поранешниниот вицепремиер, по повеќе од 14 месеци недостапност за органите на прогонот, во февруари годинава се врати во земјава и беше приведен на граничниот премин „Блаце“.