Независниот синдикат на полицијата фрла друго светло на настанот
Не стивнуваат реакциите за случајот со двете момчиња од Сарај за кои се тврди дека биле претепани од полицајци.
Откако првично од партијата ДУИ обелоденија фотографии од тепаните момчиња, а потоа и видео за кое тврдеа дека е од местото на настанот, Министерството за внатрешни работи (МВР) спроведе внатрешна контрола по што денеска соопшти дека утврдиле низа неправилности во постапувањето на шест полициски службеници против кои поведе дисциплинска постапка и најави дека ќе ги суспендира од работа.
Но, Независниот синдикат на полицијата (еден од повеќето синдикати во МВР, н.з.), фрла друго светло на настанот. Оттаму велат дека се работи за полициска акција во која осомничените лица прво се обиделе да ги прегазат полицајците, потоа одзеле службено оружје, по што почнале да бегаат и при бегството, на автопатот Скопје-Тетово предизвикале неколку сообраќајни, каде се здобивиле со повреди.
„Независниот синдикат на полицијата најостро ги осудува обидите за политичка манупулација и ставањето на етнички предзнак на борбата против недозволената трговија со дрога. Имено, од информациите со кои располагаме како синдикат, се работи за полициска акција во која осомничените лица најпрво се обидуваат да ги прегазат колегите, потоа го одземаат службеното оружје на еден од колегите, за на крај додека се даваат во бегство предизвикуваат неколку сообраќајни незгоди на автопатот Скопје – Тетово од каде се здобиваат со повреди и каде по дополнителна проверка е пронајдена дрогата“,
тврдат оттаму и повикуваат на внимателна контрола на случајот.
Оттаму додаваат дека настанот се политизира и дека е ирелевантна националната припадност на полицајците.
Настанот со претепаните момчиња е од 7 октомври. Го обелодени ДУИ заедно со фотографии од момчињата и со тврдење дека младите биле брутално нападнати и малтретирани од страна на полициските службеници.
Интегративците пред два дена објавија и видео на кое тврдат дека е прикажано бруталното полициско насилство при интервенција што се случила во средата. Оддалеку е снимено како пред паркиран автомобил неколку лица со клоци и тупаници физички напаѓаат други лица. Снимката е без заднински звук, а на неа, низ маглата може да се забележат и полициски ротациски светла.
По ваквите наводи, МВР објави дека внатрешната контрола започнала да го истражува случајот, за денеска да соопшти дека утврдиле низа неправилности во полициското постапување.
„Од извршените проверки, обезбедените снимки од настанот и обезбедените изјави на лица сведоци на настанот, утврдени се низа неправилности при постапувањето на полициските службеници за што од страна на Одделот за внатрешна контрола, криминалистички истраги и професионални стандарди при МВР против шест полициски службеници ќе биде поведена постапка за кршење на работниот ред и дисциплина и ќе бидат изречени мерки за отстранување од работно место-суспензија“,
соопшти МРВ.
Суспензија за шест полицајци поради случајот со претепаните момчиња од Сарај – 360 степени
За настанот реагира и од владејачката Влен. Оттаму вчера посочија дека со внимателност го следат случајот и повикаа да не се користи за разгорување на меѓуетнички тензии. Од Влен кажаа дека, според нивните информации, полициските службеници за кои постојат сомневања дека биле инволвирани во случајот, припаѓаат на три различни етнички заедници.