Според данската служба за безбедност и разузнавање, Русија сè повеќе користи необучени посредници – вклучително и бездомници и зависници од дрога – регрутирани преку „Телеграм“ и други платформи на социјалните мрежи. Регрутирањето обично започнува со едноставни задачи, како што се извидување или фотографирање, а потоа ескалира кон вистински операции за саботажа
Русија започна со операции за саботажа против дански компании кои ја снабдуваат Украина откако заклучи дека пошироките напори за предизвикување нарушувања не успеале да ја запрат западната воена поддршка за земјата, изјави денес претставник на данската разузнавачка служба, пишува Ројтерс.
Оваа промена одразува значителна ескалација на кампањата за хибридно војување на Москва, изјави Жозефин Кристенсен, главен аналитичар во Данската служба за безбедност и разузнавање (PET), на конференција за национална безбедност во Копенхаген.
„Во текот на пролетта гледавме многу планирање, но малку реализација, она што го видовме на почетокот на летото е дека почнаа да спроведуваат многу повеќе“,
рече Кристенсен.
Русија заклучи дека нејзините претходни напади насочени кон широк спектар цели не го постигнале ефектот на одвраќање на западната воена алијанса НАТО од поддршката за Украина, рече таа.
„Москва ја задржува политичката контрола врз операциите, но оперативната смелост расте. Русија сега се обидува да погоди цели кои имаат директно влијание врз линијата на фронтот. Тоа значи производство на оружје“,
додаде таа.
Москва постојано негира вмешаност во операции за саботажа или хибридно војување. Руската амбасада во Копенхаген денеска ги отфрли обвинувањата обвинувајќи ги данските власти за изнесување неосновани обвиненија против Русија.
Кристенсен се повика на список на руското Министерство за одбрана со наводни европски производители на дронови и компоненти за дронови, кои Москва во април ги означи како потенцијални воени цели, без да навлегува во детали.
Според данската служба за безбедност и разузнавање, Русија сè повеќе користи необучени посредници – вклучително и бездомници и зависници од дрога – регрутирани преку „Телеграм“ и други платформи на социјалните мрежи. Регрутирањето обично започнува со едноставни задачи, како што се извидување или фотографирање, а потоа ескалира кон вистински операции за саботажа.
„Тоа може да биде кој било што бара брза заработка. Ако првата личност не успее, ќе испратат друга да се справи со задачата сè додека не успеат“,
рече Кристенсен
Данската воена разузнавачка служба минатиот месец соопшти дека Русија веројатно ќе ги интензивира хибридните напади врз Западот во наредните месеци откако Германија ја обвини за обид за напад со дрон на аеродромот Лајпциг/Хале во август. Во септември 2025 година, пред Данска да биде домаќин на самит на ЕУ, дронови го попречија воздушниот сообраќај на шест дански аеродроми – вклучително и на оној во Копенхаген, кој е најпрометен во нордискиот регион – во инцидент што премиерката Мете Фредериксен го нарече хибриден напад врз нејзината земја.