Во присуство на евроамбасадорот во земјава Михалис Рокас, министрите од трите земји ќе разговараат за иницијативата покрената од грчките власти за ставање на Преспанското Езеро на списокот на светско наследство на УНЕСКО, јавува грчки „Катимерини“
Министрите за култура на Грција, Лина Мендони, на Албанија, Бленди Гоција, и на Северна Македонија, Седат Сулејмани, следниот петок (9 октомври) ќе се сретнат во грчката oпштина Преспа, каде што во присуство на евроамбасадорот во земјава Михалис Рокас ќе разговараат за иницијативата покрената од грчките власти за ставање на Преспанското Езеро на списокот на светско наследство на УНЕСКО.
Како што јавува грчкиот весник „Катимерини“, иницијативата „Голема Преспа“, покрената од грчките власти во 2014 година, сега има сојузници во двете соседни земји Албанија и Северна Македонија, со кои го дели езерото.
Евроамабсадорот во земјава Михалис Рокас во изјава за грчкиот весник посочил дека Европската Унија одлучила покрај политичката поддршка да ги финансира и првите релевантни студии во врска со иницијативата. Тој ја истакнал важноста трите соседни земји со заеднички напор да ги заштитат своите културни богатства.
На прашање на „Катимерини“, Рокас рече дека ЕУ одлучи, освен политичката поддршка, да ги финансира и првите соодветни студии. Исто така, ја истакна важноста, со геополитички димензии, на заедничкиот напор на трите соседни земји да го заштитат и да го афирмираат природното и културното богатство подарено од природата, а кое ги зближува, пишува весникот.
Градоначалникот на општина Преспа во Грција, Јоргос Стергиу, го изразил својот ентузијазам за идејата Преспанското Езеро да стане четвртиот, по Атос, Метеора и Олимп, споменик на светското наследство во земјата.
„Подготвени сме да придонесеме за иницијативата на кој било начин. Нашите односи со нашите соседи се одлични. Со години соработуваме за заштита на езерото, спроведуваме заеднички програми“,
изјавил Градоначалникот на општина Преспа во Грција, Јоргос Стергиу.
„Катимерини“ пишува дека идејата за вклучување на Преспа на списокот на светско наследство на УНЕСКО не е нова, бидејќи барањето од грчка страна официјално било поднесено на 16 јануари 2014 година.