„Планот беше тоа да биде пролетта 2027 г., но секако заради Планот за раст ние мораме да потпишеме договори во текот на 2027 г. година, со што очекувам дека во 2027 г. ќе се постави камен-темелник“, одговори министерот за дигитална трансформација на прашањето дали до крајот на мандатот на актуелната влада ќе започне изградбата на Националниот податочен центар
Националниот податочен центар ќе почне да се гради до крајот на мандатот на оваа влада, вели министерот за дигитална трансформација Стефан Андоновски во интервју за „360 степени“ на МРТ 1. Сепак, изградбата нема да почне напролет в година, како што било првично планирано.
„Планот беше тоа да биде пролетта 2027 г., но секако заради Планот за раст ние мораме да потпишеме договори во текот на 2027 г. година, со што очекувам дека во 2027 г. ќе се постави камен-темелник“,
вели Андоновски, додавајќи дека овие рокови важат ако нема предвремени парламентарни избори.
Во однос на прашањето дали македонската оператива има капацитет да го изгради дата-центарот, Андоновски оценува дека е можно, особено доколку има соодветна техничка поддршка од надвор, советување и надзор.
„Бидејќи ќе станува збор за меѓународна постапка во зависност од финансиерите, ќе се дефинира и начинот на којшто ќе биде избран изведувач. Дел од набавките се вршат национално, во зависност од тоа дали дозволуваат финансиерите, или меѓународно. Но, јас мислам дека кај нас, доколку се здружат квалитетни домашни компании, имаме капацитет. Јас сум зборувал во јавност – ние имаме веќе 7-8 податочни центри коишто се изградени со помал габарит од овој, но не толку мал, од домашни компании. Тие имаат искуство во изведбите, така што мислам дека имаме капацитет дома за ваква инвестиција“,
посочува Андоновски.
За проектот за државниот дата-центар е одобрена физибилити студија и во моментот се бара финансиер, вели министерот и додава дека во Планот за раст овој проект е оценет позитивно и е евалуиран на околу 20 милиони евра, односно компонента од 30% грант и 70%, како што вели, меки кредити. Заемот ќе зависи од банките што соработуваат со Европската Унија во процесот на поддршка на вакви иницијативи, објаснува министерот за дигитална трансформација.
Во однос на локацијата каде што би се градело, Андоновски вели дека ќе биде во близина на Скопје на државно земјиште.
„Можам да потврдам дека станува збор за локацијата помеѓу просторот каде што завршува ТИРЗ ’Скопје 1’ до наплатната станица Миладиновци или вториот дел веќе во близина на ’Скопје 2’. Ние гледаме државна парцела за да немаме проблем со откуп на земјиште, експропријации итн., и гледаме парцела на којашто немаме водоснабдителни системи или некој друг вид инфраструктурна позиционираност или опрема. Разговараме со Министерството за транспорт и сигурни сме дека ќе биде некоја од овие парцели на оваа локација“,
додава Андоновски.