fbpx
Свет

(ВИДЕО) Стотици евакуирани поради голем шумски пожар во близина на Анталија

360степени | 8 септември, 2026 20:45

Две лица се хоспитализирани со повреди на нозете, додека на шест други што вдишале чад им била укажана лекарска помош на самото место, пишува агенцијата Анадолу

Голем шумски пожар има во турската покраина Анталија, на медитеранскиот брег на југот од земјата. Поради пожарот евакуирани се стотици лица, бидејќи силните ветрови ги попречиле напорите за гаснење, пишуваат турските медиуми.

Во реонот Аксу во Анталија, пожарот брзо се проширил поради ветрови што достигнувале брзина од 30 километри на час. Пожарот се ширел кон станбените области. Властите евакуирале 254 домови и 720 луѓе во Аксу и во соседниот реон Кепез, а се евакуираат жители и од други места во околината.

Две лица се хоспитализирани со повреди на нозете, додека на шест други што вдишале чад им била укажана лекарска помош на самото место, пишува агенцијата Анадолу.

Привремено е затворен и автопатот помеѓу Анталија и градот Испарта, кој се наоѓа на околу 130 километри северно.

Пожарникарите интервенираат од воздух и од земја користејќи авиони, хеликоптери, цистерни за вода, тешка механизација и безбедносни возила. Властите соопштија дека интензитетот на пожарот се намалил и изразија надеж дека може да се стави под контрола. Чадот и пепелта од пожарот се чувствуваат и во центарот на градот Анталија.

Властите на градот Анталија потврдиле дека повеќе од 100 кучиња се преместени на безбедно место од засолниште во Аксу бидејќи пожарот и густиот чад се заканувал на објектот. Агенцијата Анадолу објави дека во регионот повеќе од 2 000 домаќинства се без електрична енергија.

Противпожарните екипи се борат и со пожарите во блиските провинции Адана и Мерсин.

Генералниот директорат за шумарство соопшти дека пожарите во овие области се ставени под контрола и оти операциите за гаснење продолжуваат.

©2026 360 степени, Сите права се задржани