Според Филипче, намалувањето за 3 000 деца не е само резултат на демографските движења, туку директна последица на иселувањето на цели семејства кои не гледаат иднина, напредок и економска поддршка во земјава
Три илјади помалку првачиња, 433 паралелки помалку и 26 затворени училишта. Вака претседателот на Социјалдемократскиот сојуз на Македонија (СДСМ), Венко Филипче, ја почна денешната прес-конференција на која упати критики до Владата предводена од Христијан Мицкоски, оценувајќи го денешниот ден како најтажен почеток на школска година во државата.
Филипче изнесе податоци според кои годинава се запишани само 14 900 првачиња, за разлика од минатата година кога нивниот број изнесувал 17 900.
Според Филипче, намалувањето за 3 000 деца не е само резултат на демографските движења, туку директна последица на иселувањето на цели семејства кои не гледаат иднина, напредок и економска поддршка во земјава.
„Ваквата состојба е последица на сè потешкиот животен стандард, растот на трошоците, отсуството на мерки за поддршка на граѓаните и изолацијата на земјата поради криминалните политики на власта“,
рече Филипче.
Тој укажа на постојаниот раст на трошоците за живот, поскапувањето на горивата за повеќе од 20 отсто и отсуството на владини мерки за заштита на граѓаните и младите брачни парови.
Како одговор на економската криза и растот на синдикалната кошничка, лидерот на СДСМ најави дека опозициската партија повторно ќе го поднесе предлог-законот за зголемување на минималната плата на 600 евра во Собранието.
Предлогот предвидува државата да ги субвенционира придонесите за приватните компании за разликата од зголемувањето, со цел на работниците да им се обезбеди достоинствен живот во услови кога трошоците за живот ги надминуваат тековните примања.
„Едноставно, работниците да можат да си обезбедат достоинствен живот на своите семејства. Инаку, ниту три минимални плати не можат да го достигнат трошокот на потрошувачката кошничка“,
рече Филипче.