Полициската управа ги предупреди граѓаните да останат во своите домови додека трага по осомничениот вооружен сторител на тројното убиство
Директорот на Полициската управа Лазар Шќепановиќ изјави дека полицијата брзо го идентификувала осомничениот за тројното убиство и оти станува збор за руски државјанин кој бил на стрелиштето „Чешка зброевка“ во претходните денови
Црногорската полиција објави дека денеска околу 17 часот било пријавено оти на стрелиштето „Чешка зброевка“ во Даниловград биле пронајдени безживотните тела на тројца мажи.
Пријавата, како што пишуваат црногорските медиуми, стигнала од сопственикот на стрелиштето кој ги пронашол телата.
„Полициските службеници, во соработка и по наредба на државниот обвинител во Вишото државно обвинителство во Подгорица, преземаат истражни и извидувачки мерки и дејствија, со цел да се утврдат околностите под кои е употребено огнено оружје и смртта на овие три лица“,
велат од Полициската управа.
Како што се додава, сторителот употребил огнено оружје за да ги убие П.Г. (24) од Подгорица, М.Р. (67) од Даниловград и Н.К. (20) од Подгорица, кои биле вработени на стрелиштето.
Според првичните информации кои ги пренесуваат медиумите, лицето по кое трага полицијата денес изнајмило оружје на тоа стрелиште.
„Постои сомневање дека по извршувањето на кривичното дело, осомничениот избегал со патничко моторно возило во сопственост на едно од починатите лица. Станува збор за возило ‘сеат кордоба’, црна боја, со регистарски број ПГ АЦ 472“,
беше објавено.
Оттаму се додава дека, по собраните информации, полицијата ќе објави фотографија и ќе даде опис на лицето.
„Силни полициски сили – специјалната полициска единица и специјалните полициски единици – беа ангажирани во потрагата по сторителот. Во неколку градови беше воспоставена блокада на потесното и поширокото подрачје. Се преземаат сите потребни мерки и дејствија во координација со надлежното обвинителство со цел да се идентификува и пронајде сторителот и да се расветли инцидентот“,
објавија тие.
Полицијата ги повика граѓаните доколку го видат споменатото возило или имаат информации за неговото движење веднаш и да ја известат Полициската управа на бесплатниот број 122, преку апликацијата „Полиција на Црна Гора“ или на друг достапен начин.
„Апелираме до граѓаните да бидат внимателни и, доколку го видат споменатото возило или лице, веднаш да ги проследат информациите до полицијата“,
беше објавено.
Полициската управа ги предупреди граѓаните да останат во своите домови додека трага по осомничениот вооружен сторител на тројното убиство.
Подоцна медиумите објавуваат дека полицијата се сомнева оти рускиот државјанин Михаил Николаевич Шабунин (30) избегал со црно возило „сеат кордоба“ откако го извршил тројното убиство во Даниловград.
Директорот на Полициската управа Лазар Шќепановиќ изјави дека полицијата брзо го идентификувала осомничениот за тројното убиство.
Тој во изјава за новинарите на местото на несреќата во Даниловград вели дека станува збор за руски државјанин кој бил на стрелиштето „Чешка зброевка“ во претходните денови.
„Полицијата го идентификува осомничениот за многу краток временски период. Станува збор за руски државјанин кој бил на стрелиштето во изминатите неколку дена“,
рече Шќепановиќ.
Шќепановиќ рече дека осомничениот, по пробното пукање, влегол на стрелиштето и отворил оган.
„Денес, откако извршил пробно пукање на стрелиштето, влегол во објектот и убил три лица. Потоа со своето возило однел една од жртвите во непознат правец. Бараме возило и осомничен“,
рече Шќепановиќ.
Шќепановиќ додава дека осомничениот претставува опасност за граѓаните.
„Станува збор за опасно лице кое со себе донело одреден број парчиња муниција и огнено оружје. Тој претставува потенцијална опасност, активна закана. Сите капацитети на Полициската управа се ставени на располагање“,
рече Шќепановиќ.
Како што пишува Вјести.ме, автомобилот со кој се сомнева дека избегал Шабунин е пронајден во Рогами, во близина на ресторанот „Стефан“. Полициската управа официјално објави дека возилото е пронајдено на ливада, се додава во објавата.