Никој од американската администрција формално не објави детали за патувањето, а официјален Кремљ потврди дека Ретклиф бил во Москва, но дека не се сретнал со рускиот претседател Владимир Путин, туку Путин само бил информиран за средбата, пренесува „Гардијан“
Посетата на директорот на ЦИА, Џон Ретклиф, на Москва, кој вчера слета на рускиот аеродром „Внуково“ со воен авион што полетал од Рига, Латвија, е „полурутинска“ според американскиот претседател Доналд Трамп. Тој го изјавил ова во телефонско интервју за конзервативниот радиоводител Глен Бек.
Никој од американската администрација формално не објави детали за патувањето, а официјален Кремљ потврди дека Ретклиф бил во Москва, но дека не се сретнал со рускиот претседател Владимир Путин, туку Путин само бил информиран за средбата, пренесува „Гардијан“.
Водителот Бек го прашал претседателот дали посетата има врска со шпекулациите дека Путин е подготвен да ја тестира решителноста на НАТО да ги брани своите земји-членки од надворешни напади, но Трамп ги отфрлил шпекулациите дека средбите во Москва биле поврзани со можна ескалација од Русија.
„Не сакам да ги разочарувам луѓето. Тој не беше таму поради причините што ги споменавте. Можеби ќе излезе нешто. Работиме многу напорно да и ставиме крај на таа војна“,
рекол Трамп, мислејќи на војната во Украина.
Ненадејната посета на Ратклиф на Москва е тема што го привлекува вниманието на светските и на регионалните медиуми, бидејќи доаѓа во време кога САД се обидуваат да им стават крај на војните во Украина и во Иран.
Хрватскиот портал „Индекс“ пренесува анализа од Мајкл Вајс, еден од најупатените американски новинари во руски прашања и во дипломатските политики, според кого една од главните цели на ова патување било да се испрати директно предупредување до Москва во врска со какви било идеи за ескалација против Европа и НАТО.
„Ова е поврзано со разузнавачките информации што САД ги споделиле со Полска, балтичките и со скандинавските држави, како и со засилените саботажи на руската воено-разузнавачка служба ГРУ во Европа“,
вели Вајс во објава на Икс.
If I had to wager, I’d say Ratcliffe is in Moscow to warn about Russian escalation against Europe/NATO. Linked to U.S. intelligence shared with Poles, Balts and Scandinavians, and comes amid a noticeable uptick in suspected GRU sabotage operations and Russian drone activity. See…
— Michael Weiss (@michaeldweiss) August 25, 2026
Тој потсетува дека во ноември 2021 година тогашниот шеф на ЦИА, Бил Барнс, исто така отпатувал во Москва да го предупреди Путин да не ја напаѓа Украина.
Вчера наутро корисници на сервисот „Флајтрадар 24“ и очевидци забележале воен транспортен авион „боинг Ц-17А глобмастер“ како полетува од Рига и слетува на аеродромот „Внуково“. Потоа се објавија информации дека во леталото бил шефот на ЦИА.
A convoy with US diplomatic license plates was spotted in Moscow following the arrival of a US military aircraft. At the same time, the Kremlin stated it had no information regarding the aircraft, while Peskov assured that no meetings with US administration representatives were… pic.twitter.com/1VehaaaMe8
— WarTranslated (@wartranslated) August 25, 2026
Од ЦИА одбиле да дадат коментар за медиумите. Ратклиф се задржал во Москва само четири часа, што според Вајс значи дека најверојатно не се сретнал со Путин, кој би го принудил да чека со часови за состанок.
Аналитичарите не ја исклучуваат можноста тој да имал состанок со шефот на руската надворешна разузнавачка служба СВР, Сергеј Наришкин.
Откако Доналд Трамп повторно ја презеде должноста претседател на САД, Москва неколкупати ја посети неговиот специјален пратеник Стив Виткоф. Во дел од дипломатските мисии на Виткоф, тој беше придружуван и од зетот на Трамп, бизнисменот Џаред Кушнер. Ратклиф и Наришкин имале телефонски разговор во март 2025 година и се заложиле да одржуваат редовна комуникација, пренесува „Индекс“.