Од хоспитализираните 21 пациент, вирусот е потврден кај 18 пациенти, а за тројца се чекаат резултатите. Шест пациенти се на интензивно лекување
Од почетокот на епидемијата досега се регистрирани вкупно 53 случаи на западнонилска треска – информира денеска на прес-конференција министерот за здравство Сашо Клековски. Од вкупниот број на досега потврдени случаи, вели Клековски, 25 се излекувани и пуштени дома, има пет смртни случаи, а 21 пациент е хоспитализиран.
Од хоспитализираните, вирусот е потврден кај 18 пациенти, а за тројца се чекаат резултатите. Од потврдените случаи со западнонилска треска, шест пациенти се на интензивно лекување.
„Од овој вкупен број на 53 пациенти, 52 се со нервно инвазивна форма, еден е без нервно инвазивна форма и тој е меѓу тие што се сметаат за излекувани и отпуштени. Од овие 52 со нервно инвазивна форма – 51 биле третирани или сè уште се третирани во Клиниката за инфективни болести, еден е во приватна здравствена установа“,
изјави министерот, додавајќи дека отпуштен е и пациентот кој се лекува на приватна клиника.
Клековски вели дека пациентите редовно се испишуваат од болница. Најмладата пациентка од Студеничани е веќе отпуштена, а министерот очекува наскоро да биде пуштен дома и најмладиот пациент од Зелениково на 26 години.
„Во однос на третманот, издадовме ажурурано упатство до лекарите, за да го свртиме вниманието на пациентите со имуносупресивната терапија кои може да бидат потенцијални проблематични случаи со вирусот на западнонилска треска. Посебно внимание треба да се ставни на нив бидејќи дел од тестовите може да бидат лажно негативни, па се препорачува да се направат неколку тестови за да се потврди вирусот. Така што, побаравме во анамнезата задолжително да се побара дали се користат имуносупресивни лекови“,
изјави министерот.
Клековски потврди дека прв случај на западнонилска треска е евидентиран во Куманово. Во скопско Драчево, пак, како што вели, не е регистриран нов случај од 9 август, а очекува под контрола да бидат ставени и жариштата во Гази Баба. Новите случаи, додава министерот, се доста распрскани и немаат јасни геолоцирања со жариштата.
Од 14 август досега, како што информира првиот човек на Здравство, извршена е четвртата тура прскање против возрасни комарци и во Скопје и тоа авионска – на 20 и 21 август и земјена – од 23 до 26 август.
„Надвор од тоа направени се и шест прскања по индикации. Прскање по индикации е направено во Гази Баба на над 400 хектари, направено е второто прскање против возрасни комарци во Кисела Вода, односно во Драчево. Вонредни, односно по индикација се и прскањата во Зелениково, Студеничани, Бутел и Ѓорче Петров. Сите овие се во таргетираните подрачја и се дел од подрачјата каде што имаме појава на случаи“,
вели Клековски.
Овој период лани во земјава имало два случаи на западнонилска треска. Според Клековски, ваквата разлика во бројот на заразени оваа споредено со минатата година се должи на непредвидливоста на вирусот.
„Оваа година се приближуваме на вкупниот број на случаи од минатите години, односно 54 заразени со пет смртни случаи во пртходните години. Постојано го споменувам примерот со 2018 година, кога на европско ниво имаше заразени колку претходните седум години. Значи, нема стандарди за однесување и во целата научна литература се потенцира непредвидливоста на вирусот на западнонилска треска“,
додава тој.