Имплементацијата на системот „Безбеден град“ од МВР велат дека продолжува и оти неговата примена постепено ќе се прошири и на останатите гранични премини во државата
Странците што со возила поминуваат низ земјава, а сториле сообраќаен прекршок од денеска ќе бидат казнувани на граничниот премин „Табановце“, информираат од Министерството за внатрешни работи (МВР).
Оттаму додаваат дека на „Табановце“, на излез од државата, при контролата се појавуваат возила кај кои системот има претходно евидентирано сообраќајни прекршоци.
„На возачите им се соопштува дека е евидентиран прекршок и им се издава записник за сторен сообраќаен прекршок со прекршочен платен налог, со можност казната да ја подмират согласно законската постапка“,
велат од МВР.
Зголемениот број возила што денес е евидентиран на граничниот премин велат дека е поради тоа што станува збор за прв ден од примената на овој механизам, при што се опфаќаат и претходно евидентираните прекршоци.
Велат дека се преземаат активности за непречено одвивање на постапката и намалување на задржувањето на патниците.
Од МВР велат дека со воведувањето на овој механизам се обезбедува еднаков и неселективен пристап во санкционирањето на сообраќајните прекршоци, без оглед дали станува збор за возила со домашни или странски регистарски таблички.
Имплементацијата на системот „Безбеден град“ од МВР велат дека продолжува и оти неговата примена постепено ќе се прошири и на останатите гранични премини во државата.
Инаку, министерот за внатрешни работи Панче Тошковски на 1 јули најави дека системот „Безбеден град“ наскоро ќе почне да евидентира и да испраќа казни за сторени сообраќајни прекршоци до странски државјани. Тој апелираше до граѓаните што транзитираат низ земјава, особено по коридорите 8 и 10, да бидат одговорни и да ги почитуваат сообраќајните правила.
Системот „Безбеден град“ за автоматско евидентирање на сообраќајните прекршоци функционира од 1 февруари годинава, а до сега се евидентирани над 120 000 сообраќајни прекршоци.