Чешкиот шеф на дипломатијата, Мацинка, порачал дека местото на Македонија е во Унијата и додал дека на Чешката Република ѝ се потребни сојузници со слично минато, менталитет и култура
Долгиот македонски и западнобалкански пат кон Брисел била главната тема на денешната средба на претседателката Гордана Сиљановска-Давкова со министерот за надворешни работи на Чешката Република, Петр Мацинка, кој престојува во официјална посета на земјава.
За време на средбата, соговорниците ги потврдиле традиционално пријателските односи меѓу двете земји, засновани врз меѓусебна почит и заедничкото наследство преку делото на сесловенските просветители Св. Кирил и Методиј.
Претседателката Сиљановска-Давкова, како што наведуваат од нејзиниот кабинет, истакнала дека дводеценискиот кандидатски статус за членство во ЕУ не произлегува од неусогласеноста со европското право и пракса, туку од блокадите на некои соседи од ирационален идентитетски карактер.
„Европската интеграција на Западниот Балкан е не само политичко и техничко, туку и европско безбедносно прашање“,
рекла Сиљановска-Давкова.
Чешкиот шеф на дипломатијата, Мацинка, порачал дека местото на Македонија е во Унијата и додал дека на Чешката Република и се потребни сојузници со слично минато, менталитет и култура.
Македонската претседателка се заблагодарила за поддршката од Чешка преку иницијативата „Пријатели на проширувањето“, како и преку ангажманот во рамките на Вишеградската група и форматот Славков. На средбата била изразена заедничка подготвеност за проширување и зајакнување на соработката во областа на економијата, туризмот, науката и образованието.
Министерот за надворешни работи на Чешка, Петр Мацинка, кој е во дводневна официјална посета на земјава, за време на заедничката прес-конференција со својот македонски колега Тимчо Муцунски во Охрид, рече дека Чешка е подготвена да помогне во процесот на постигнување прифатливо решение за Скопје и Софија. Тој во оваа смисла ги нагласи добрите односи што Прага ги има со Северна Македонија и со Бугарија.
Мацинка додаде дека Европската Унија има силен интерес за проширување, а со тоа и интерес за отстранување на последните пречки за напредокот на Северна Македонија. Според него, ЕУ треба да знае да го вреднува степенот на подготвеност на земјава за членство, но и направените отстапки во минатото.