„Нашите барањата беа јасни – бараме итно зголемување на цената на куртовската капија, бараме итна и навремена исплата на субвенциите по килограм предадена роба и површина, бараме намалување на рокот на исплата на три месеци за предадена количина во фабриките, а бараме во иднина да имаме и редовни и навремени состаноци со министерството, фабриките и откупувачите најмалку месец дена пред секоја сезона на сеидба и берба“, порачаа струмичките земјоделци
Со пораките – „Милостина, не благодарам. Да – за фер цена“, „Со 25 денари моите деца ќе се раѓаат во Шајцарија и ЕУ“, „Дајте цена за пиперот, за да остарам на дедовото огниште“, струмичките земјоделци и денеска излегоа на протест со своите деца.
Најголем дел од нив се производители на пиперката од сортата „куртовска капија“ и се револтирани од, за нив, ниската откупна цена од 25 денари од килограм со кои велат дека не можат да ги покријат ниту трошоците.
Со своите трактори и земјоделска механизација го блокираа подрачното одделение на Министерството за земјоделство, шумарство и водостопанство.
Иако веќе е најавено дека ќе има мало зголемување на откупните цени, земјоделците велат дека протестите сепак ќе продолжат до исполнување на нивните барања.
„Нашите барањата беа јасни – бараме итно зголемување на цената на куртовската капија, бараме итна и навремена исплата на субвенциите по килограм предадена роба и површина, бараме намалување на рокот на исплата на три месеци за предадена количина во фабриките, а бараме во иднина да имаме и редовни и навремени состаноци со министерството, фабриките и откупувачите најмалку месец дена пред секоја сезона на сеидба и берба“,
велат организаторите на протестот.
Министерот за земјоделство Борче Серафимовски по посетата на Струмица пред неколку дена изјави дека цената ја определуваат пазарните услови, но начинот на кој се одвива откупот мора да биде законски, транспарентен и предвидлив.
„Улогата на Министерството за земјоделство е да ги сослуша аргументите на сите страни, да обезбеди почитување на правилата и да придонесе за откуп на пиперката што ќе го вреднува трудот на земјоделците и ќе овозможи непречен пласман“,
изјави министерот Серафимовски.
Според најавите од Министерството, во текот на оваа работна недела министерот ќе се сретне и со сопствениците на преработувачките капацитети.