„Отстранувањето на албанскиот јазик од државните табли на граничниот премин ‘Табановце’, на територијата на Општина Куманово, претставува директно прекршување на законот и на уставните обврски за употреба на јазиците“, реагираат од ДУИ
Опозициската Демократска унија за интеграција (ДУИ) соопшти дека од државните табли на граничниот премин „Табановце“ е отстранет албанскиот јазик.
Споделувајќи фотографија од една од таблите, од партијата констатираат дека се работи за прекршување на законот за што ја обвинуваат владејачката партија Влен.
„Отстранувањето на албанскиот јазик од државните табли на граничниот премин ‘Табановце’, на територијата на Општина Куманово, претставува директно прекршување на законот и на уставните обврски за употреба на јазиците. Ова е тешка провокација и јасен доказ за екстремната немоќ на Вреди да ги заштити дури и најосновните права на Албанците“,
соопшти ДУИ.
Од ДУИ бараат албанскиот јазик веднаш да биде вратен на државните табли, а надлежните институции јавно да се извинат.
„Влен носи директна одговорност за ова. Наместо да го спречи деградирањето на албанскиот јазик, измислува празни оправдувања и со манипулативни видеа се обидува да ги измами граѓаните. Албанскиот јазик е службен јазик и неговата употреба е законска обврска. Срам за оваа потчинетост“,
додаваат од партијата.
Инаку, во член 16 од законот за употреба на јазиците пишува дека:
„На граничните премини на Република Македонија и аеродромите кои се наоѓаат на подрачјата каде најмалку 20% од граѓаните зборуваат јазик различен од македонскиот јазик називите на институциите, другите натписи и патокази се пишуваат на македонски јазик и неговото кирилско писмо како и на јазикот што го зборуваат најмалку 20% од граѓаните и неговото писмо“.
Според пописот од 2021 година, во Општина Куманово има вкупно 98 104 жители од кои Албанци се 25 493 или околу 26 отсто од населението. А граничниот премин „Табановце“ е на територија на оваа општина.