Нашата генерациска должност, додаде претседателката, е како што и самиот Методија Андонов-Ченто рекол – е да ја чуваме и браниме слободата како зеницата во окото. А државата, додаде таа, се чува и се брани со демократски политички систем, со уставен патриотизам, со вложување во младите, со мудра надворешна политика и со национално помирување
Никому не му ја должиме изборената држава. Затоа, никој нема право да ја ревидира нашата национална историја оти секој народ, па и македонскиот, има право на своја историја – порача претседателката на државата Гордана Сиљановска-Давкова во своето обраќање по повод одбележувањето на 2 Август – Илинден.
Во обраќањето пред споменикот на Методија Андонов-Ченто на плоштадот „Македонија“ во Скопје, шефицата на државата порача дека имаме долг кон историската вистина и асномската генерација, која, како што рече, со крв извојува слобода и македонска република. Нашата генерациска должност, додаде Сиљановска-Давкова, е како што и самиот Ченто рекол – да ја чуваме и браниме слободата како зеницата во окото.
А државата, додаде претседателката, се чува и се брани со демократски политички систем, со уставен патриотизам, со вложување во младите, со мудра надворешна политика и со национално помирување.
„Државата се чува со вложување во младите. Токму младите се изборија за слободата и ја создадоа државата. Речиси половина од асномците биле помлади од 30 години. За жал, денес, најперспективните млади луѓе масовно се иселуваат во потрага по пристојно место за живеење. Некои, поради блокираните евроинтеграции, посегаат и по пасош од други држави членки. Наша должност е да се бориме против корупцијата и организираниот криминал, против партократијата, ама и против загадувањето. Само кога знаењето и успехот ќе бидат поважни од книшката и познанствата, младите ќе останат да живеат, да работат и да создаваат семејства тука, дома“,
порача претседателката.
Во однос на уверувањето дека државата се брани со мудра надворешна политика, претседателката се осврна на евроинтеграцискиот пат на земјава, за кој рече дека е искуство со уникатен предзнак и постојана незавршена низа од барања со кои се оспорува и се нарушува нашето суверено право на самоопределување. Од блокадата на македонската евроинтеграција, додаде таа, не губиме само ние, туку и тие што нè блокираат.
„Државата јакнее преку националното помирување. На Ченто му замерувале поради неговата подготвеност да се помири со довчерашните неистомисленици, под услов да застанат на истата, македонската линија. Ако сакаме нашата држава да биде пристојно место за живеење, мора да ги надминеме поделбите и да научиме да зборуваме во еден глас за прашањата од национален интерес. Тоа денес ни е потребно повеќе од кога било порано“,
порача шефицата на државата.
Осврнувајќи се на македонската мултиетничка реалност, за која рече дека АСНОМ водело сметка преку својот Манифест упатен до сите етнички заедници, претседателката порача дека ако сакаме да живееме во европска демократија, мирот и соживотот во хетерогеното општество мора да ги чуваме преку гарантирање и заштита на правата и на заедниците, но не на штета на индивидуалните човекови права.