Според информации од Собранието, оставката на уставниот судија Гоце Наумовски е неотповиклива, а во образложението тој навел дека ја поднесува од професионални и лични причини
Наумовски за уставен судија беше избран на 18 февруари оваа година на предлог на Собранието, откако професорката Јадранка Дабовиќ-Анастасовска во декември лани си поднесе оставка од функцијата уставна судијка поради здравствени и лични причини. Како и Дабовиќ-Анастасовска и Гоце Наумовски е професор на Правниот факултет „Јустинијан Први“ при Универзитетот „Свети Кирил и Методиј“ – Скопје
Професорот Гоце Наумовски поднесе оставка од функцијата судија на Уставниот суд на Република Северна Македонија.
Наумовски оставката ја доставил до Собранието. Од законодавниот дом за „360 степени“ потврдија дека оставката е депонирана и архивирана од собраниските служби.
Неофицијално, според информации од Собранието, оставката на уставниот судија Гоце Наумовски е неотповиклива, а во образложението тој навел дека ја поднесува од професионални и лични причини.
Од Собранието не можеа да потврдат дали оставката е доставена до претседателот Африм Гаши, кој, како што велат од законодавниот дом, претпладнево имал обврски, односно состаноци.
Од Уставниот суд, пак, велат дека судијата Гоце Наумовски до Судот не доставил официјална информација дека поднесува оставка, а официјална потврда досега не стигнала ниту од Собранието.
Сепак, како што додаваат од Уставен, претседателот на Судот, Дарко Костадиновски, за оставката на судијата Наумовски добил потврда во телефонски разговор со претседателот на Собранието, Африм Гаши.
„До Судот, од страна на судијата Гоце Наумовски не е доставена официјална информација дека поднесува оставка. Судијата денеска беше отсутен од седницата. Официјална потврда не е пристигната ниту од Собранието. Претседателот Костадиновски единствено доби потврда за оставката во телефонски разговор од претседателот на Собранието, Африм Гаши“,
велат од Уставниот суд.
Инаку, како што дознаваме, судијата Гоце Наумовски не присусвувал ниту на седницата на Уставен, одржана минатата среда (8 јули).
Наумовски за уставен судија беше избран на 18 февруари оваа година на предлог на Собранието.
Неговиот избор следуваше откако професорката Јадранка Дабовиќ-Анастасовска во декември лани си поднесе оставка од функцијата уставна судијка поради здравствени и лични причини.
Како и Дабовиќ-Анастасовска, и Гоце Наумовски е професор на Правниот факултет „Јустинијан Први“ при Универзитетот „Свети Кирил и Методиј“ – Скопје.
Тој, пред да биде избран за уставен судија беше еден од надворешните соработници на премиерот Христијан Мицкоски од областа на правото. Наумовски е брат на ексвицепрeмиерот за евроинтеграции во една од претходните влади на ВМРО-ДПМНЕ, Васко Наумовски.
Инаку, Наумовски за уставен судија беше предложен од претседателот на собраниската Комисија за прашања за изборите и именувањата, Ѓорѓија Сајкоски, од ВМРО-ДПМНЕ, кој тогаш за него посочи дека има импресивна биографија и кредибилитет за уставен судија и ќе ги штити Уставот и интересите на граѓаните. Комисијата без дискусија и со мнозинство гласови го утврди професорот како предлог за уставен судија, по што Собранието на пленарна седница со 63 гласа „за“, седум против и ниту еден воздржан го потврди неговиот избор на функцијата.
Предлогот Наумовски да биде избран за уставен судија тогаш наиде на отпор од опозицискиот Социјалдемократски сојуз, од каде што оценија дека станува збор за кадровско решение од кабинетот на премиерот Мицкоски, обвинувајќи дека со тоа се потврдува намерата на власта целосно да ја наметне својата контрола во судството и обвинителството.
Со неотповикливата оставка на Наумовски, Уставниот суд останува со седум судии, откако изборот на Елизабета Дуковска за уставна судијка беше поништен по пресуда на Управниот суд, а на нејзино место сè уште не е избран нов уставен судија, иако Судскиот совет уште кон крајот на март за функцијата ја предложи судијката во Апелацискиот суд Скопје, Мери Дика Георгиевска.