На денешната седница, Владата одобри и предлог-национален план за реинтеграција, ресоцијализација и рехабилитација на повратници од странски војски и членови на нивните семејства
Одлука за постоење кризна состојба на дело од територијата на Северна Македонија донесе Владата на денешната седница, пордаи зголемен обем на влез и транзитирање на мигранти низ земјава.
Одлуката е донесена откако Владата ја разгледала информацијата од шестата седница на Управувачкиот комитет за координација и управување со кризи, одржана на 26 јуни 2020 година.
Кризната состојба утврдена со оваа одлука ќе трае 30 дена од денот на нејзиното влегување во сила, односно од 2 јули. Со тоа, како што соопштија од Владата, се активира и Главниот штаб при Центарот за управување со кризи кој ќе биде во постојано заседавање.
„Со оваа одлука, Владата го задолжи Главниот штаб при Центарот за управување со кризи да изготви акциски план за превенција и справување со влезот и транзитирањето на мигрантите низ територијата на Северна Македонија, како и целосен преглед за расположливи човечки и материјално – технички ресурси и план за координирано дејствување, а органите на државната управа да преземат мерки и активности согласно со прописите за управување со кризи“,
соопштија од Владата.
На предлог на Националниот комитет за спречување насилен екстремизам и борба против тероризам, Владата денеска ја разгледа и усвои и Информацијата во врска со предлог – национален план за реинтеграција, ресоцијализација и рехабилитација на повратници од странски војски и членови на нивните семејства (жени и деца).