„Но, таа (оптимизацијата) нема да се прави насилно, училиштата се на општините, тие имаат градоначалници. Никој нема насилно да си оди, но треба да ја почнеме оптимизацијата и да не молчиме за проблемот што ќе се зголемува. Нема новороденчиња, тоа не е случај само кај нас, туку глобално“, рече ресорната министерка одговарајќи на прашање на пратеничката од СДСМ, Сања Лукаревска, на денешната собраниска седница
Ниту еден наставник нема да биде отпуштен од работа при оптимизирањето на училишната мрежа, изјави денеска министерката за образование и наука Весна Јаневска наведувајќи дека во законите се предвидени опции оние наставници што останале без ученици, со нивна согласност, да бидат ангажирани како образовни асистенти во период од една година.
Јаневска ова го кажа одговарајќи на пратеничко прашање на денешната собраниска седница, а во врска со оптимизацијата на училишната мрежа, процес кој, како што кажа, било неопходно да се спроведе одамна, но претходната влада предводена од СДСМ немала храброст да го направи тоа.
Во тој контекст, таа кажа дека ништо не се прави насилно, туку исклучиво транспарентно, со согласност на наставниот кадар и во соработка со општините, УНИЦЕФ и Светската банка.
Аргументирајќи ги своите тврдења, ресорната министерка рече дека две третини од сите училишни објекти во државата се подрачни училишта, но оти во нови учат само 12 проценти од вкупниот број ученици.
„Во околу 100 училишни објекти учат помалку од 5 деца. Нив мора да ги интегрираме во поголемите училишта, заради поголема социјализација и едукација во подобри услови. Нивните најдобри интереси се примарната причина за оптимизирањето на училишната мрежа. Второстепено е дека општините ќе заштедат средства кои потоа можат да ги вложуваат во инфраструктура“,
рече Јаневска.
Министерката сподели и податоци дека во последните 20 години бројот на ученици се намалил за 28 отсто, додека бројот на наставници се зголемил за 46 отсто. Како резултат на тоа, националниот просек се намалил од 18 ученици по наставник на 11,4 ученици по наставник, споредено со просекот на ОЕЦД кој е 15 ученици по наставник.
„Како резултат на тоа, бројот од 18 ученици по наставник се намали на 11,4 ученици по наставник, што е многу повеќе во споредба со европскиот просек и тоа доведе до вишок на наставен кадар од околу 13 проценти. Иако јас велам дека во ниедна земја доктор и наставник не може да биде вишок, но проблем е што имаме училишта со три или пет ученици. И тука не се во прашање трошоците, туку тие деца остануваат изолирани и несоцијализирани, последни се на тестирањата и затоа треба да направивме нешто за тие ученици да се интегрираат“,
рече Јаневска одговарајќи на прашање на пратеничката од СДСМ, Сања Лукаревска.
Министерката наведе дека дел од наставниците добиле можност да бидат прекфалификувани во кариерни советници за да останат на работа или да работат како образовни асистенти.
Јаневска потврди дека пратила допис до училиштата за број на првачиња за да направат план на паралелки и да го достават до Министерството за образование и наука, за да се види, како што рече, што може да се направи со оптимизацијата.
„Но, таа (оптимизацијата) нема да се прави насилно, училиштата се на општините, тие имаат градоначалници. Никој нема насилно да си оди, но треба да ја почнеме оптимизацијата и да не молчиме за проблемот што ќе се зголемува. Нема новороденчиња, тоа не е случај само кај нас, туку глобално, 124 училишта спонтано се затворија, не ги оптимизиравме ние, туку нема новородени и неколку години нема првачиња“,
рече министерката за образование и наука.