Без да споменуваат имиња, од Фудбалската федерација на Македонија посочија дека во 2019 година доставиле пријава во ОЈО ГОКК, по која потоа е покрената истрага и поднесена кривична пријава во 2020 година. Според документацијата доставена до надлежните институции, како што посочуваат оттаму, вкупната штета нанесена на ФФМ за периодот од јануари 2015 година до крајот на 2019 година изнесува повеќе од 2,5 милиони евра
Фудбалската федерација на Македонија (ФФМ) попладнево се произнесе во врска со наводите во дел од медиумите дека во акцијата на ОЈО ГОКК е приведен поранешниот претседател на Федерацијата, Илчо Ѓорѓиоски, поради сомнежи за финансиски малверзации во периодот додека бил на оваа позиција.
Без да споменуваат имиња, од ФФМ посочија дека Федерацијата во 2019 година доставила пријава во Обвинителството за организиран криминал и корупција, по која потоа Управата за финансиска полиција покренала истрага и по која е поднесена кривична пријава во 2020 година. Според документацијата доставена до надлежните институции, како што посочуваат оттаму, вкупната штета нанесена на ФФМ за периодот од јануари 2015 година до крајот на 2019 година изнесува повеќе од 2,5 милиони евра.
„Во изминатиот период ФФМ немаше повратни информации за текот на постапката и евентуалното постапување по предметот. На крајот на 2025 г. од Федерацијата беше побарана дополнителна документација, која во целост беше доставена до надлежното обвинителство на почетокот на 2026 г. Истовремено со официјален допис повторно беше укажано на висината на утврдената штета и беа доставени дополнителни релевантни информации“,
велат од ФФМ додавајќи дека ќе продолжат да соработуваат со институциите во постапките поврзани со евентуални незаконитости и заштита на интересите на ФФМ.
Претходно денеска Основното јавно обвинителство за гонење организиран криминал и корупција (ОЈО ГОКК) информира дека во координација со Управата за финансиска полиција и Министерството за внатрешни работи се спроведува акција на повеќе локации во Скопје поврзана со ФФМ.
Во меѓувреме дел од медиумите неофицијално објавија дека во акцијата е приведен експретседателот на ФФМ, Илчо Ѓоргиевски, кој беше на чело на Федерацијата од 2012 до 2018 година.