Претседателката на државата, според агендата, ќе оствари средба и со претседателот на Националниот совет на Словачка, Рихард Раши, како и со потпретседателот на словачката влада и министер за одбрана, Роберт Калињак
Претседателката на државата, Гордана Сиљановска-Давкова, која од вчера е во официјална посета на Република Словачка, денеска во Братислава ќе биде пречекана со највисоки државни и воени почести од словачкиот претседател Петер Пелегрини.
Според соопштението од претседателскиот кабинет, предвидено е Сиљановска-Давкова и Пелегрини да одржат тет-а-тет средба, по што ќе следи пленарен состанок на македонската и словачката делегација.
Претседателката на државата, според агендата, ќе оствари средба и со претседателот на Националниот совет на Словачка, Рихард Раши, како и со потпретседателот на словачката влада и министер за одбрана, Роберт Калињак.
Во рамките на посетата, Сиљановска-Давкова ќе положи венец пред Споменикот на слободата, во меморијалната област Девин.
Сиљановска-Давкова утре во Националниот центар за култура и образование во Братислава ќе ја посети групната изложба насловена „Од глаголица до светлина: Визуелна ода за Св. Кирил и Методиј“, со дела на македонските уметници Ана Митевска, Ангел Коруновски, Лазе Трипков и Александра Костадиновска. Куратор на изложбата е Кирил Пенушлиски.