Корисниците ќе избираат дали патарината ќе им се одбива директно од банкарската картичка или ќе им се додава на месечната сметка за мобилни услуги
М-таговите за наплата на патарините отсега ќе бидат достапни и преку двата најголеми мобилни оператори во земјава – „А1 Македонија“ и „Македонски телеком“, најавија од Јавното претпријатие за државни патишта (ЈПДП) од каде што велат дека ова е со цел електронската наплата да стане подостапна и патарините да се поминуваат полесно и побрзо.
Наместо досегашното купување исклучиво во просториите на ЈПДП или на наплатната станица „Петровец“, граѓаните ќе можат да го набават уредот преку операторите на 24 месечни рати од по 49 денари.
Корисниците ќе избираат дали патарината ќе им се одбива директно од банкарската картичка или ќе им се додава на месечната сметка за мобилни услуги.
Директорот на ЈПДП, Коце Трајановски, истакна дека Македонија сè уште заостанува зад соседите во користењето електронски уреди, што предизвикува непотребни метежи.
„Проблемот се мултиплицира затоа што на патарините каде што има М-таг поминуваат и со М-кард и доколку нема пари на картичката се прави застој. Сето тоа го смалува протокот на возила на наплатните станици. Целта е да се зголеми протокот на возила на патарините, а еден од главните начини е да имаме што поголема достапност на М-таговите“,
изјави Трајановски додавајќи дека моментално наплатата со М-тагови изнесува околу 36 отсто.
Покрај олеснувањето на достапноста на М-таговите, Трајановски најави дека се разгледуваат и промени во начинот на кој ќе се наплаќа патарината во иднина и оти се работи на студија за воведување наплатен систем по поминат километар, сличен на оној во Србија.
Овој модел најпрво се планира за Коридорот 8, каде што наплатата би се вршела на последната наплатна станица или на излезите.
Трајановски потврди дека нема да има промена на цената на патарините.