Според одлуката на Регулаторната комисија за енергетика (РКЕ), цената на дизелот се намалува за четири денари, а за половина денар поевтино ќе се продава бензинот БС-98
Од ноќеска на полноќ горивата ќе се продаваат по нови цени.
Според одлуката на Регулаторната комисија за енергетика (РКЕ), цената на дизелот се намалува за четири денари, а за половина денар поевтино ќе се продава бензинот БС-98.
Па така, од полноќ новата цена на дизелот е 89,5 денари за литар, бензинот БС-98 ќе се продава за 86,5, а цената на бензинот БС-95 не се менува и останува 85 денари за литар.
Со одлуката на РКЕ, од полноќ за 4,5 денари се намалува и малопродажната цена на екстра лесното масло за домаќинство и тоа ќе се продава за 94 денари.
За 0,248 денари за килограм се зголемува цената на мазутот кој со одлуката на РКЕ од полноќ ќе се продава за 49,968 денари за килограм.
Овие цени дополнително се намалуваат за попустот што компанијата ОКТА го воведе за горивата, кој важи до 18 мај и се нуди при продажба на дизел и бензини кон големопродажните и малопродажните трговци.
Попустот за дизел изнесува три денари по литар, а за бензините од 95 и 98 октани тоа е два денари по литар.
Со ова, цената на дизелот би се спуштила на околу 86,5 денар.
Министерката за енергетика Сања Божиновска минатата недела најави дека ако е потребно, повторно ќе се разговара со ОКТА за продолжување на попустот за дизел-горивото и за бензините и по 18 мај, кога истекува сегашниот договор. Тоа, како што вели, ќе зависи од случувањата со цените на нафтените деривати на берзите и од војната на Блискиот Исток.