Од ДУИ посочуваат дека компанијата „Green Maintenance“ е формирана само неколку недели пред распишувањето на тендерот за чистење на коридорите под далноводите. Иако без претходна работна историја, фирмата успеала да добие договор вреден 236 000 евра
Демократската унија за интеграција (ДУИ) преку соопштение обвинува за нов случај на корупција и партиско фаворизирање во државната компанија МЕПСО.
Според партијата, станува збор за сомнителен тендер доделен на компанијата „Green Maintenance“, за која тврдат дека е поврзана со активисти на коалицијата ВЛЕН.
Од ДУИ посочуваат дека компанијата „Green Maintenance“ е формирана само неколку недели пред распишувањето на тендерот за чистење на коридорите под далноводите. Иако без претходна работна историја, фирмата успеала да добие договор вреден 236 000 евра.
„Она што го прави случајот уште поскандалозен е фактот што еден од сопствениците, Шабан Шефки, јавно се појавува како активист и поддржувач на ВЛЕН и Изет Меџити, додека договорот го потпишува директорот на МЕПСО, Бурим Латифи – прв братучед на Меџити“,
стои во партиското соопштение.
Опозициската партија потсетува дека ова не е прв скандал поврзан со раководството на МЕПСО. Тие го споменуваат и договорот со компанија од Бања Лука за далноводот кон Албанија, каде според нивните тврдења, државата е оштетена за милионски суми.
ДУИ упати јавен повик до надлежните институции за итна реакција и бараат Државната комисија за спречување корупција (ДКСК) да го испита случајот, а Јавното обвинителство и Државниот завод за ревизија веднаш да отворат постапка и да истражат дали зад овој тендер стои организирана шема за извлекување на јавни пари.
„Додека граѓаните се соочуваат со економска криза, луѓе блиски до власта отвораат компании преку ноќ за да добијат тендери од стотици илјади евра“,
додаваат од ДУИ.