„Фајненшл тајмс“ објави дека нејзиното заминување е поврзано со разликите во ставовите во врска со политиката на претседателот Доналд Трамп и намалената мотивираност поради ослабената поддршка за Украина
Вршителката на должноста амбасадор на САД во Украина, Џули Дејвис, ќе се повлече од својата функција по помалку од една година на функцијата, соопшти Стејт департментот. Повлекувањето доаѓа во услови на застој во напорите посредувани од САД за постигнување прекин на огнот и ставање крај на руската инвазија.
„Фајненшл тајмс“ објави дека нејзиното заминување е поврзано со разликите во ставовите во врска со политиката на претседателот Доналд Трамп и намалената мотивираност поради ослабената поддршка за Украина.
Од Стејт департментот негираат дека имало несогласувања и велат дека таа не се повлекува.
„Лажно е да се сугерира дека амбасадорката Дејвис поднесува оставка ’поради разлики со Доналд Трамп’. Таа ќе продолжи гордо да ги унапредува политиките на претседателот Трамп сè додека официјално не го напушти Киев во јуни 2026 година и не се пензионира“,
вели портпаролот на Стејт департментот, Томи Пигот.
Дејвис, највисоката функционерка во Амбасадата на САД, е вршителка на должноста, но не е амбасадор потврден од Сенатот. Таа, исто така, е амбасадор на САД во Кипар од 2023 година извршувајќи двојна улога за време на нејзиниот престој во Киев.
Таа беше именувана од администрацијата на Трамп во мај минатата година откако нејзината претходничка, дипломатка од кариера Бриџит Бринк, се повлече.