Во гостување на емисијата „Трилинг“, лидерот на СДСМ обвини оти државните институции се целосно узурпирани и партизирани од страна на власта, и рече оти најавениот Закон за полиција ќе донесе партиски кадри од улица на раководни функции
Најавите за укинување на концептот на Пржинската влада е сериозен ризик за демократскиот процес и вовед во изборен фалсификат, вели претседателот на СДСМ, Венко Филипче, кој во телевизиско гостување упати остри критики кон владата на премиерот Христијан Мицкоски, обвинувајќи ја за неспособност и немање капацитет да организира фер и демократски избори.
Филипче, меѓу другото, беше дециден оти државниот апарат и институциите во моментот се ставени под целосна партиска контрола, што го доведува во прашање целиот иден изборен процес и упати прашање како тие би имале капацитет сами да се справуваат со овие процеси, кога покрај узурпацијата на институциите, властите го партизираат и судството и полицијата.
„Со новиот Закон за полиција, кога ќе се усвои со новата систематизација, ќе се укине кариерниот напредок. Партиски луѓе од улица ќе бидат ставени на раководни функции. Дополнително, скратени се парите што ги добиваат полицајците. Премиерот од собраниската говорница им дава насоки на судии и обвинители, а не знаеме ниту кој и како ги чува податоците од системот ‘Сејф сити’“,
рече лидерот на СДСМ.
Филипче се осврна и на влошената демократска атмосфера предизвикана од медиумското влијание, обвинувајќи оти медиуми под контрола на власта континуирано шират лажни вести и антиевропска пропаганда. Според него, ваквата власт веќе покажала дека нема капацитет за демократски избори, бидејќи и извештаите испратени до ОБСЕ за локалните избори во 2025 година, покажале оти активисти на ВМРО-ДПМНЕ делеле пари на гласачките места пред очите на полицијата.
Токму затоа, Филипче смета дека инсистирањето за укинување на техничката влада има само една јасна цел.
„Вистинското прашање е зошто ова власт инсистира да се укине Пржинската влада? Тоа е вистинското прашање. Зошто ако тоа е гарант за фер и демократски избори? Зошто им сметат опозициски претставници во власта за време на спроведувањето на изборите? Тоа е вистинското прашање. А одговорот однапред го знаеме. Затоа што сакаат да направат изборен фалсификат“,
заклучи тој.
Венко Филипче претходно упати предупредување до парламентарното мнозинство најавувајќи дека пратеничката група на социјалдемократите и коалицијата целосно ќе се повлечат од работната група за Изборниот законик доколку власта не се откаже од укинувањето на техничката влада.