Според најавите, новиот парк треба да претставува зелен простор за рекреација, спорт и семејни активности, кој градоначалникот го опишува како нови бели дробови на Скопје и иден центар на градскиот живот
Почна процесот на одгасување на депонијата во Вардариште, како прв чекор кон реализација на проектот за изградба на мегапарк на ова подрачје, соопшти денеска скопскиот градоначалник Орце Ѓорѓиевски на неговиот профил на социјалната мрежа Фејсбук.
Според него, по изработената физибилити студија, почна процесот на одгасување на депонијата во Вардариште, при што се мапирани 22 точки, односно бунари за собирање на отпадните гасови кои со години се таложеа на ова место.
„Од секоја бушотина ќе се земаат примероци кои ќе бидат анализирани во сертифицирани лаборатории, со цел утврдување на составот и количеството на гасовите“,
вели Ѓорѓиевски.
Паралелно, како што информира градоначалникот, се спроведува и процес на површинско расчистување на депонијата.
„Вардариште ќе стане минато. Она што со децении беше симбол на запоставеност и ризик за здравјето, го претвораме во нов почеток“,
вели тој.
На локацијата е предвидена изградба на мегапарк со површина од околу 300 000 квадратни метри.
Според најавите, новиот парк треба да претставува зелен простор за рекреација, спорт и семејни активности, кој градоначалникот го опишува како нови бели дробови на Скопје и иден центар на градскиот живот.
Покрај паркот, се најавува и изградба на нов мост што ќе ги поврзува општините Гази Баба и Аеродром, со цел намалување на сообраќајниот метеж и подобрување на градската поврзаност.
Центарот за управување со кризи (ЦУК) вчера информира за пријава за пожар на дивата депонија кај Вардариште.
Во врска со пожарот на скопската дива депонија реагираше иницијативата „Стоп за Вардариште“, која ги предводеше повеќемесечните протести во Скопје откако на крајот на август минатата година избувна голем пожар на дивата депонија. Оттаму ги повикаа надлежните да реагираат итно и со највисок степен на сериозност, а МВР да го врати полициското присуство на депонијата.