По пукањето во Кахраманмараш, како што објави турската државна телевизија ТРТ хабер, биле преземени и мерки за блокирање на 66 интернет адреси и отстранување на содржината објавена на нив
Турската полиција привела 83 лица, блокирала 940 профили на социјалните мрежи и затворила 93 групи на апликацијата за пораки Телеграм поради објави што негативно влијаат врз општеството и ги величаат криминалот и криминалецот.
Во полициското соопштение се вели дека мерките се преземени како дел од истрагите за пукањата во училиштата во Кахраманмараш и Шанлиурфа.
„Осумдесет и три лица беа приведени и против нив беа преземени правни мерки откако беше утврдено дека споделувале објави и извршувале активности што содржеле квалификации што го фалеа злосторството и криминалот и негативно влијаеле врз општеството“,
се вели во соопштението.
По пукањето во Кахраманмараш, како што објави турската државна телевизија ТРТ хабер, биле преземени и мерки за блокирање на 66 интернет-адреси и отстранување на содржината објавена на нив.
Според властите, од предметните интернет адреси била дистрибуирана провокативна содржина поврзана со нападот преку Телеграм. Исто така, се додава дека е започната истрага против профили што дистрибуирале снимки од пукањето преку комуникацискиот канал. Група на Телеграм со над 100 000 члена, во која се дистрибуирале снимки поврзани со пукањето, е затворена.
Инаку, во вчерашниот напад во училиште во Кахраманмараш беа убиени девет лица, а тринаесет повредени откако 14-годишен ученик отвори оган врз нив.
Еден ден претходно, 19-годишен поранешен ученик во училиште во Шанлиурфа, исто така отвори оган врз училиштето, ранувајќи 16 лица. Двајцата стрелци беа пронајдени мртви.
Во однос на вчерашното пукање, полицијата рече дека биле извршени првични проверки на телефонот на 14-годишниот сторител, кој бил ученик во осмо одделение во училиштето каде што отворил оган.
„Првичните истраги открија дека сторителот на својот Ватсап профил користел слика во која се повикува на Елиот Роџер, кој изврши напад во Соединетите Американски Држави во 2014 година“,
се вели во соопштението на турската полиција.
Оттаму додаваат дека дигиталните материјали запленети при претресите на домот на сторителот и автомобилот на неговиот татко се конфискувани и се испитуваат.