„Ги повикуваме сите завојувани страни да почитуваат прекин на огнот насекаде во траење од две недели за да ѝ се овозможи на дипломатијата да постигне договор за конечно завршување на војната, а во интерес на долгорочен мир и стабилност во регионот“, соопшти пакистанскиот премиер
Од Белата куќа соопштија дека претседателот Трамп е информиран за предлогот на Пакистан и дека ќе има одговор
Додека светот е во исчекување да види колку американскиот претседател, Доналд Трамп, е сериозен во заканите дека ќе го уништи Иран, премиерот на Пакистан, Шехбаз Шариф побара продолжување на рокот за договор што Трамп му го даде на Техеран, наведувајќи дека дипломатските напори напредуваат стабилно и силно, со потенцијал да доведат до суштински резултати во блиска иднина, пренесоа светските медиуми.
Инаку, Пакистан е земјата што посредува меѓу Иран и САД за деесклација на војната и постигнување договор за мир.
„Цела една цивилизација вечерва ќе умре и никогаш повеќе нема да се врати“, порача американскиот претседател Доналд Трамп во последното предупредување во контекст на актуелниот конфликт со Иран. Тој му постави рок на Техеран да постигне договор и да го отвори Ормускиот теснец до 20 часот по Вашингтонско време, односно 2 часот в среда по средноевропско време, или во спротивно САД ќе ја бомбардираат цивилната инфраструктура во Иран.
Шариф побара од Трамп да им даде на преговорите рок од уште две недели. Тој, исто така, го повика Иран да го отвори Ормутскиот теснец за тие две недели, како гест на добра волја.
„Исто така, ги повикуваме сите завојувани страни да почитуваат прекин на огнот насекаде во траење од две недели за да ѝ се овозможи на дипломатијата да постигне договор за конечно завршување на војната, а во интерес на долгорочен мир и стабилност во регионот“,
рече Шариф во пораката што ја објави на социјалните мрежи.
Во посебна изјава, министерот за надворешни работи на Пакистан рече дека израелското бомбардирање на Иран го нарушило напредокот што е постигнат во разговорите.
Техеран и Вашингтон разговараат индиректно, преку медијатори, предводени од Пакистан, а исто така и со учество на Турција и Египет. Според информациите, двете страни размениле предлози за ситуацијата преку Исламабад.
Од Белата куќа соопштија дека претседателот Трамп е информиран за предлогот на Пакистан и дека ќе има одговор.
Инаку, Трамп во текот на денот неколку пати одби да сподели детали со медиумите за разговорите меѓу САД и Иран, наведувајќи само дека земјите се вклучени во „жестоки преговори“, пренесе Би-би-си.
„Претседателот е информиран за предлогот и одговорот ќе дојде“,
наведе портпаролката на Белата куќа, Каролин Левит.
Претходно, портпаролката во изјава за неколку медиуми, меѓу кои Ал Џезеира и „Волстрит журнал“ го повтори ултиматумот на Трамп до Техеран, наведувајќи дека само американскиот претседател знае што ќе направи доколку Иран не постигне договор.
„Иранскиот режим има рок до 20 часот по источно време да го искористи моментот и да склучи договор со Соединетите Држави. Само претседателот знае како стојат работите и што ќе направи“,
изјави Левит.
Критики за изјавата на Трамп дека вечерва една цела цивизлација ќе умре наиде на бројни критики низ светот.
Папата Лав XIV изјави дека заканите насочени кон населението на Иран се „неприфатливи“ и би го прекршиле меѓународното право.
Во некои од неговите најсилни коментари досега против војната, првиот американски папа ги повика Американците и другите луѓе со добра волја да контактираат со своите политички лидери и претставници на Конгресот за да побараат да ја отфрлат војната и да работат за мир.
„Денес, како што сите знаеме, имамше закана против целиот народ на Иран, и ова е навистина неприфатливо“,
рече тој во разговор со новинарите додека го напушташе папскот одморалиште во Кастел Гандолфо, надвор од Рим.