Дел од медиумите наведуваат дека администрацијата на Трамп би можела да поднесе дополнително барање до Конгресот оваа недела за зголемување на буџетот за одбрана. Според функционерите, на кои се повикуваат медиумите, можно е да бидат побарани десетици милијарди долари, со цел да се продолжи воената кампања против Иран
Пентагон во првите два дена од воената операција против Иран потрошил муниција во вредност од околу 5,6 милијарди долари, пишуваат светските медиуми, повикувајќи се на наводите на тројца американски функционери.
Весникот „Вашингтон пост“ објави дека оваа бројка дополнително ја зголемува и онака растечката загриженост меѓу дел од претставниците во Конгресот на САД, кои сметаат дека американските сили со голема брзина ги трошат ограничените залихи од најнапредното оружје на земјата.
Проценката, која вчера била презентирана пред Конгресот, според пишувањата, покренува нови прашања во врска со негирањето на администрацијата на претседателот Доналд Трамп дека операцијата против Иран не ја загрозува борбената готовност на американската војска.
Дел од медиумите наведуваат дека администрацијата на Трамп би можела да поднесе дополнително барање до Конгресот оваа недела за зголемување на буџетот за одбрана. Според функционерите, на кои се повикуваат медиумите, можно е да бидат побарани десетици милијарди долари, со цел да се продолжи воената кампања против Иран.
Таквото барање се очекува да наиде на отпор кај многумина членови на Конгресот од редот на демократите, чии обиди да ја ограничат способноста на администрацијата да преземе понатамошни воени дејствија против Иран досега беа неуспешни.
Во одговор на прашања од „Вашингтон пост“ за состојбата на американските залихи оружје, портпаролот на Пентагон, Шон Парнел, изјавил дека Министерството за одбрана на САД има сè што е потребно за да изврши каква било мисија, во кое било време и на кое било место што ќе ја нареди претседателот на земјата.
Она што и понатаму останува под прашање е колку долго би можела да трае воената операција на САД во Иран. Претседателот Доналд Трамп минатата недела изјави дека операцијата би можела да трае повеќе од еден месец, но вчера за Си-би-ес њуз изјави дека ситуацијата е темелно, речиси целосно решена, притоа наведувајќи дека Иран претрпел значителни загуби.
Секретарот за одбрана Пит Хегсет и првиот човек на Здружениот штаб на вооружените сили на САД, генералот Ден Кејн, минатата недела во изјава за медиумите рекоа дека воената кампања постепено се префрла од потпирање на скапа прецизна муниција на ласерски водени бомби, кои се многу повеќе достапни.
Ова, според нивните наводи, треба да биде придружено со понатамошен напредок на американските и израелските сили подлабоко во Иран, откако ќе се утврди воздушната супериорност.
„Проценката од 5,6 милијарди долари покажува колку биле скапи нападите пред да започне транзицијата“,
навеле американските функционери, кои зборувале под услов да останат анонимни поради чувствителноста на податоците.
Тие не прецизирале колку и каков вид муниција била користена во раните првите денови од воената операција, пренесува ХРТ.
САД префрлаат ресурси од други делови на светот
Весникот „Вашингтон пост“ претходно објави дека американската војска од почетокот на непријателствата на 28 февруари, истрелаа стотици прецизни ракети, кои вклучувале напредни системи за пресретнување на противнички проектили, како и крстосувачки ракети од типот „томахавк“.
Централната команда на силите на САД – Сентком (CENTCOM), која е одговорна за воените операции на Блискиот Исток, соопшти дека во нападите се погодени повеќе од 5 000 цели во Иран, при што се употребени повеќе од 2 000 парчиња муниција.
Марк Кансијан, експерт кој ги следи залихите на оружје на САД во Центарот за стратешки и меѓународни студии – ЦСИС (CSIS), вели дека преминот кон поевтини видови муниција значително ќе ги намали трошоците за еден напад – од милиони долари по ракета до помалку од 100 000 долари, во одредени случаи.
Како што резервите се намалуваат, американската војска ги префрла ресурсите од други делови на светот, вклучувајќи го и Индо-пацифичкиот Регион, поради што дел од законодавците во Конгресот извесно време предупредуваат дека ограничените залихи на напредно оружје би претставувале хендикеп за САД во случај на потенцијален судир со Кина.
Според тврдењата на двајца американски функционери, Пентагон преместува делови од системот за одбрана на големи надморски височини – Terminal High Altitude Area Defense (THAAD) од Јужна Кореја на Блискиот Исток. Американската војска, исто така, користи напредни ракетни системи за пресретнување од типот „патриот“ од Индо-пацифичкиот Регион и од други места, со цел да ја зајакне својата одбрана од ирански напади со беспилотни летала и балистички ракети.
Еден од функционерите навел дека ваквиот потег не е поради непосреден недостиг на оружје на Блискиот Исток, туку како мерка на претпазливост во случај Иран значително да го зголеми темпото на одмазднички напади.
„Колку повеќе ракети THAAD и ‘патриот’ користите, толку поголем ризик преземате во Индо-пацификот и во Украина“,
вели Кансијан.
Инаку, двата системи за воздушна одбрана се сметаат за едни од најнапредните во светот.
Пред операцијата, генералот Кејн го предупреди претседателот Трамп дека продолжениот конфликт со Иран би можел да ги исцрпи американските залихи на прецизно наведувана муниција, кои веќе се исцрпени од долгогодишната поддршка за Украина во нејзината војна со Русија, како и во други воени операции што администрацијата на САД ги води во најмалку седум земји, објави „Вашингтон пост“.
Администрацијата на Трамп, од друга страна, се обиде да ја минимизира проценката на генералот Кејн.