Концесионерите обвинуваат за неред во регионалната депонија што им троши драгоцено време. Директорот, пак, бара разбирање и вели дека и во трафика се чека ред
Камиони полни со комунален отпад утрово со часови во колона чекале пред депонијата „Русино“ за да го истоварат ѓубрето. Еден од концесионерите во регионот реагира на, како што вели, општиот неред во кој се наоѓа депонијата, а поради кој и тие не можат да планираат колку од своето работно време ќе го потрошат чекајќи да одложат отпад.
Тој до редакцијата на „360 степени“ испрати видео и вели дека јавната реакција е резултат на тоа што проблемот се провлекува подолго време наназад.
„Соработката со депонијата ‘Русино’ се одвива во општ хаос, не им се знае ниту работното време. Некогаш почнуваат со работа во 8, некогаш во 11, а од друга страна, нас нè условуваат дека мора да сме таму најдоцна до 15 часот, единствено прават исклучок за ‘Комуналец’ од Гостивар. Утринава бевме заглавени најмалку 2 часа. Наместо да работиме на терен, цела прва смена ја губиме таму, што е премногу“,
вели еден од концесионерите во разговор за „360 степени“.
Објаснува дека како концесионер во околна општина, обврзан е отпадот да го одлага во „Русино“, за што плаќа по 520 денари од тон.
„Како што секој месец плаќаме за депонирање, така и си ги бараме правата“,
заклучува тој.
„Застоите се повремени“
Од раководството на депонијата негираат дека проблемот е хроничен.
„Немаме застој, тоа се случува понекогаш бидејќи имаме голема количина на отпад и ако ги пуштиме сите наеднаш горе, ќе нема каде да вртат. Девет општини се што одлагаат отпад, треба да имаат разбирање, голема е тонажата. Не е само да се одлага, ние треба да го средиме тој отпад. Ние им излегуваме во пресрет кога треба и после работно време. И во трафика да одите да купите цигари, се чека ред, не во депонија каде што девет општини одлагаат отпад“,
вели за „360 степени“, директорот на ЈП „Русино Полог“, Сазан Хорвати.
Депонијата „Русино“ е регионална и во неа се одложува отпадот од деветте општини од Полог.
Пред две недели добија нова специјална механизација вредна над еден милион евра за, како што беше кажано, поуспешно управување со цврст отпад и зајакнување на оперативниот капацитет на депонијата.