„Слушав од медиумите за прозивките, но ингеренциите на Судскиот совет и на Советот на јавните обвинители се поинакви, значи ние можеме да расправаме, но за тоа одлучуваат републичкиот и вишиот обвинител, таму има хиерархија“, изјави денеска Бесими прашан за коментар на вчерашниот повик од министерот за правда Игор Филков
Претседателот на Советот на јавните обвинители, Башким Бесими вели дека за евентуални пропусти при одлучувањето за замена на затворскиот со куќен притвор на Артан Груби, може да постапуваат виш јавен или републички јавен обвинител, бидејќи така налага принципот на хиерархија во Јавното обвинителство.
Што се однесува до Советот со кој претседава, според него, тој одлучува само по жалби.
Бесими ова го кажа пред почетокот на денешната седница на Советот на јавните обвинителите, прашан од новинарите за коментар на вчерашната изјава на министерот за правда, Игор Филков, кој ги повика Советот на јавните обвинители и Судскиот совет да утврдат дали има основ за одговорност кај надлежниот јавен обвинител што предложил, и кај судијата на претходна постапка што прифатил поранешниот прв вицепремиер Артан Груби да оди во куќен притвор.
„Слушав од медиумите за прозивките, но ингеренциите на Судскиот совет и на Советот на јавните обвинители се поинакви, значи ние можеме да расправаме, но за тоа одлучуваат републичкиот и вишиот обвинител, таму има хиерархија“,
рече тој.
Прашан од новинарите колку е честа праксата обвинителите да бараат мерка куќен притвор за лица што се бараат со меѓународна потерница и дали тоа се коси со одредени правила и норми, Бесими рече дека тоа е став на Обвинителството, кое ја донело одлуката, и тој како претседател на Советот не може да каже ништо во однос на тоа.
За јавните прозивки на Филков на обвинителот и судијата што учествувале во процесот на носење одлука за куќниот притвор на Груби, Бесими рече дека тоа е став на министерот, но додаде оти смета дека не е во ред наведувањето со име и презиме.
Претседателот на Советот на јавните обвинители, во контекст на темата, кажа дека на секој предмет треба да се гледа одделно.
Министерот за правда Игор Филков вчера на прес-конференција ги повика Судскиот совет и Советот на јавни обвинители да свикаат итни седници и да утврдат дали има елементи за одговорност кај јавниот обвинител кој побара и судијата што одобрил куќен наместо ефективен притвор за поранешниот прв вицепремиер и министер Артан Груби, кој завчера се појави на македонско-косовската граница по повеќе од една година бегство.
„Јавниот обвинител Даниел Коцев да објасни врз основа на кои конкретни факти и правни аргументи е дадено позитивно мислење за замена на притворот; раководителот на обвинителството Анел Фидоски – дали стои зад оваа одлука и дали смета дека ова е порака за еднаква примена на законот; судијата на претходна постапка при Основниот кривичен суд – Скопје, Марин Станевски – кои околности го надминале ризикот од бегство кај лице кое 14 месеци било недостапно“,
рече Филков.
Членката на Судскиот совет, Сузана Јошевска-Анастасовска, вчера во објава на Фејсбук наведе Советот нема потреба да заседава и да расправа во врска со одлуката на судијата на претходна постапка, посочувајќи на едно од основните правила во кривичната постапка, според кое судија не смее да изрече мерка притвор ако има предлог од обвинител за куќен притвор.
Инаку, од Јавното обвинителство вчера информираа дека за ваквата одлука биле исполнети специфични услови, односно дека Министерството за внатрешни работи и (МВР) и Агенцијата за национална безбедност (АНБ) процениле дека во затворот во Шутка не може да му се гарантира безбедноста на Груби.
Коментирајќи ги овие наводи, Филков рече дека не може безбедносни индиции да станат поважни од принципот на еднаквост пред законите, како и дека ако постои закана, државата има механизми да осигури безбедност и во рамки на притворскиот систем.
Откако ги упати прашањата за одговорност до Обвинителството и судот, одговарајќи на новинарско прашања на новинарско прашање дали адресата треба да бидат и МВР и АНБ кои ја направиле проценката за постоење ризик, Филков рече дека очекува одговори и од нив.
По реакциите и прозивките со кои се бара одговорност за куќниот притвор на Груби денеска се огласија од Здружението на јавните обвинители, од каде што бараат политичките партии и функционерите да се воздржат од јавната реторика со која се нарушува самостојноста на јавните обвинители во одлучувањето.
Оттаму посочија дека како Здружение немаат овластување да ги коментираат одлуките на јавните обвинители по конкретни предмети, но имаат право и обврска да ја заштитат самостојноста на обвинителите.