На притисокот се приклучи и Словачка, чиј премиер Роберт Фицо се закани дека ќе го прекине итното снабдување со електрична енергија за украинската мрежа
Унгарија најави дека ќе го блокира 20-тиот пакет санкции на Европската Унија против Русија, како и планираниот заем од 90 милијарди евра за Украина, сè додека Киев не го обнови транзитот на руска нафта преку нафтоводот „Дружба“.
Остриот ултиматум денеска го соопшти унгарскиот министер за надворешни работи Петер Сијарт во пресрет на утрешниот Совет за надворешни работи на ЕУ во Брисел. Преку објава на социјалната мрежа Икс, тој порача дека Будимпешта нема да дозволи носење одлуки што се важни за Киев додека не се нормализира снабдувањето со нафта за Унгарија и Словачка.
Огромниот бескаматен заем од 90 милијарди евра, кој исто така се најде под унгарска блокада, беше првично договорен за да ги покрие воените и економските потреби на Украина во следните две години.
Спорниот прекин на испораките преку „Дружба“ трае од крајот на јануари, а украинските власти тврдат дека инфраструктурата на нафтоводот била оштетена при руски напад со беспилотни летала. Сепак, унгарскиот државен врв смета дека не постојат никакви технички пречки за транзит и го обвинува Киев за политичка уцена со цел да предизвика енергетска криза пред претстојните избори во Унгарија.
Како контрамерка на прекинатиот нафтен транзит, Унгарија веќе го стопира извозот на дизел гориво кон Украина, кое покрива околу 10 отсто од украинските потреби. На притисокот се приклучи и Словачка, чиј премиер Роберт Фицо се закани дека ќе го прекине итното снабдување со електрична енергија за украинската мрежа доколку нафтата не потече низ „Дружба“ до утре.