За чантата на сопругата се огласи и скопскиот градоначалник Орце Ѓорѓиевски, кој посочи дека од СДСМ претставуваат вакви сензации бидејќи не можат да му најдат ниту една сериозна замерка за работата во Град Скопје, во време кога гледаат дека главниот град повторно се исправува на нозе, а резултатите се видливи
Чантата е купена на попуст за 944 денари во продавница во земјава, вели Мартина Ѓорѓиевска, сопругата на скопскиот градоначалник Орце Ѓоеѓиевски.
Во објава на својот фејсбук-профил, таа вели дека чантата што ја носела на вчерашниот настан во Македонската филхармонија по повод 100 дена од градоначалничкиот мандат на сопругот нема никаква врска со брендот „Хермес“ ниту, пак, чини 30 илјади долари, како што денеска соопштија од опозициската партија.
„Мојата чанта не е некакви 30 илјади долари, како што тврди СДС, туку е купена во продавница на ‘Метро Македонија’, и тоа на попуст за 944 денари. Таа нема никаква врска со брендот ‘Хермес‘ ниту по потекло, ниту по цена, ниту по вредност, ниту носи натпис на брендот. Доколку не веруваат, може да им ја дадам на увид, а и можат да ја посетат продавницата, има одлични работи за супер евтини цени за луѓе што живеат скромен и чесен живот“,
вели сопругата на Ѓорѓиевски.
Според неа, безобразен е обидот да се создаде наратив за луксуз и аздисаност преку лаги и клевети.
Побара јавно извинување за, како што вели, изнесените невистини, но и повлекување на лажните тврдења.
„Во спротивно ќе ги искористам сите правни механизми за заштита на честа и угледот. Политиката не смее да се води преку лаги и лични дискредитации“,
додаде таа.
За чантата на сопругата се огласи и скопскиот градоначалник Орце Ѓорѓиевски, кој посочи дека од СДСМ претставуваат вакви сензации бидејќи не можат да му најдат ниту една сериозна замерка за работата во Град Скопје, во време кога гледаат дека главниот град повторно се исправува на нозе, а резултатите се видливи.
„Со ниски удари, со фабрикувани приказни и со напади врз семејството, затоа што политика и аргументи одамна немаат“,
вели тој.
И тој побара јавно извинување во рок од 24 часа од СДСМ, објавено на истата фејсбук-страница каде што, како што додава, ја пласираа лажната вест, како и во медиумите.
„Доколку тоа не се случи, ќе поднесам пријава и ќе ги искористам сите правни механизми за заштита на мојот и на угледот и честа на моето семејство“,
напиша Ѓорѓиевски.
Опозицискиот Социјалдемократски сојуз (СДСМ) денеска објави дека сопругата на Ѓорѓиевски на вчерашниот настан во Македонската филхармонија по повод 100 дена од неговиот мандат се појавила со брендирана чанта марка „хермес“, посочувајќи дека станува збор за една од најексклузивните и најскапи бренд чанти во светот.
„Ваквите чанти ‘хермес мини кели 2′, од 20 сантиметри, чинат од 28 до 33 илјади долари“,
велат од СДСМ.
Оттаму доставија неколку фотографии од брендираната чанта како доказ по која цена таа може да се купи.