Премиерот смета дека истрагата за случајот ќе доведе до многу важни имиња кои се дел или се поврзани со опозицискиот СДСМ, дел со коалицијата „Европски фронт“ предводена од ДУИ, но и со други експолитичари
Има индиции дека марихуаната што беше фатена во Србија потекнува од Македонија – изјави вечерва премиерот Христијан Мицкоски во интервју за телевизија Канал 5.
„Според оние информации кои јас ги имам на располагање, постојат такви индиции дека сепак марихуаната потекнува од Македонија, тоа е прво. Второ, во текот на денешниот ден имаме кривична пријава којашто веќе опфаќа 10 лица покрај оние двајца кои се веќе приведени. Ова е само почеток“,
вели Мицкоски.
На прашањето како дрогата излегла од Македонија и дали била заведена под лажна декларација, премиерот вели дека согласно граничниот систем со едно застанување, на македонско-српската граница има само една проверка на товарот – за влез во Србија го контролираат припадниците на Министерството за внатрешни работи на Србија, а влезот во Македонија – македонските. Царината, додава Мицкоски, суди врз основа на царинската декларација.
„Ако вие имате царинска декларација, пломбирано возило – тоа е тоа. Но, од другата страна на границата има начин како тоа да се провери и најверојатно е со таков тип на документ пренесена, но јас не би избрзувал со какви било коментари бидејќи истрагата е во тек. Само што почнавме, мислам дека до крајот на истрагата ќе излезат многу работи кои изминативе месеци се работеа“,
изјави Мицкоски во интервјуто за Канал 5.
На прашањето дали марихуаната можела да биде пренесена во Србија без да бидат вклучени лица од македонската полиција или царина, Мицоски е дециден:
„Aпсолутно да.“
Премиерот смета дека истрагата за случајот ќе доведе до многу важни имиња кои се дел или се поврзани со опозицискиот СДСМ, дел со коалицијата „Европски фронт“ предводена од ДУИ, но и со други експолитичари.
„Само тогаш да не испадне дека тоа е политички реваншизам или хајка бидејќи сè ќе биде поткрепено со докази“,
додава тој.
Инаку, во интервју за Телевизија 21 што ќе биде емитувано вечерва, министерот за внатрешни работи Панче Тошковски најавува дека во текот на денот ќе биде поднесена кривична пријава против 10 лица кои се директно или индиректно поврзани со нелегално производство и пуштање во промет на марихуаната. Постојат основани сомненија, вели Тошковски, дека овие лица се поврзани со транспортот на марихуаната во Србија.