Во врска со актуелниот проблем, струшкиот градоначалник ја обвини поранешната локална власт за, како што рече, лошо менаџирање и ненавремено преземање мерки. Додаде дека сите чинители ќе одговараат за ваквата состојба
Градоначалникот на Струга, Менди Ќура, најави дека на 16 февруари приватна институција од Скопје, која тој лично ја ангажирал, ќе ги испитува причините за загадувањето на водата во Струшко, објави порталот „Сакам да кажам“. Најавата доаѓа во момент кога стружани веќе една недела не можат да ја користат водата од градскиот водовод, која поради нејзината заматеност, е целосно забранета за употреба.
Ќура вели дека се преземени сите мерки и дека сите институции и надлежни органи работат на случајот.
„Веруваме дека за неколку дена стружани ќе имаат чиста вода за пиење и користење. Веќе в понеделник имаме нарачано да дојде од Скопје приватна институција која ќе испитува од каде се случува овој феномен“,
изјави струшкиот градоначалник.
Во врска со актуелниот проблем, Ќура ја обвини поранешната локална власт за, како што рече, лошо менаџирање и ненавремено преземање мерки. Додаде дека сите чинители ќе одговараат за ваквата состојба.
Водата од струшкиот водовод од минатата недела е забранета за секаква употреба поради многу висока заматеност во изворот Шум и низ сите мерни места низ градот. Во врска со случајот предмет отвори Основното јавно обвинителство Струга, кое ќе ги испитува причините за појавата и евентуално сторените кривични дела против животната средина и природата.