Кој сѐ е вмешан во овој картелски скандал во Македонија, прашува опозицискиот СДСМ откако денеска беше објавено дека петте тони марихуана што беа запленети во Србија на 29 јануари биле набавени на територијата на Северна Македонија
Во соседна Србија запленета е огромна количина од пет тони дрога која дошла од Македонија. Косопственик на македонска фирма е меѓу уапсените. Ова е огромен скандал за кој мора да им одговорност. Ова е реакцијата на опозицискиот СДСМ откако денеска беше објавена информацијата дека запленетата марихуана на 29 јануари во Србија била набавена на територијата на Северна Македонија.
Од СДСМ јавно поставија повеќе прашања.
„Како пет тони дрога завршиле во Србија преку Македонија, а Владата молчи? Кој дозволил преку македонската граница да помине огромна количина дрога? Без поддршка на структури во власта и во македонските институции, ова е невозможно да се случи. Кој се е вмешан во овој картелски скандал во Македонија“,
прашуваат од СДСМ.
Од партијата велат дека со денови алармирале за поврзаноста на криминални структури во Македонија и во Србија.
„Сѐ уште нема одговор ниту за сликите на Мицкоски со криминалецот С.З. познат како Симе, уапсен во случај со поголема количина дрога, оружје, муниција и голема количина пари. Во судовите во Србија и Црна Гора се цитираат скај-преписки за ‘шефот Оскар’. САД носат закон за Западен Балкан со фокус на борбата против корупцијата и криминалот. Македонија го има својот Мадуро. За ваков картелски скандал мора да има одговорност! Работата не е завршена! Сите ќе одговарате!“,
порачаа од СДСМ.
Инаку, Вишиот суд во Белград им одреди притвор на три лица што беа уапсени по заплената на петте тони марихуана во регионот на селото Коњух кај Крушевац, во централна Србија, пренесуваат тамошните медиуми.
Осомничените за кривично дело неовластено производство и дистрибуција на наркотични дроги за време на сослушувањето го искористиле своето законско право да молчат.
Како што е наведено во соопштението, оваа организирана криминална група дејствувала на меѓународно ниво, а во јануари годинава набавила повеќе од пет тони марихуана на територијата на Северна Македонија.
Особено е индикативно што еден од осомничените со иницијали И.Д. е косопственик на компанијата „Алфафарм“, која е регистрирана во Скопскиот Регион и е наменета за производство и преработка на медицински канабис.