Согласно одлуката на РКЕ малопродажните цени на бензините еуросупер БС-95 и еуросупер БС-98 и на екстра лесното масло за домаќинство (ЕЛ-1) се зголемуваат за 1,50 денари за литар, додека цената на еуродизел (Д-Е V) се зголемува за два денари за литар
Горивата од ноќеска на полноќ поскапуваат за 1,5 до два денари за литар, одлучи денеска Регулаторната комисија за енергетика (РКЕ). Со одлуката се врши зголемување на малопродажните цени на нафтените деривати во просек за 2,46 отсто.
Согласно одлуката на РКЕ малопродажните цени на бензините еуросупер БС-95 и еуросупер БС-98 и на екстра лесното масло за домаќинство (ЕЛ-1) се зголемуваат за 1,50 денари за литар, додека цената на еуродизел (Д-Е V) се зголемува за два денари за литар. Со тоа, новата малопродажна цена на еуросупер БС – 95 е 72 денари за литар, еуросупер БС – 98 ќе се продава за 74, еуродизел БС (Д-Е V) за 66,5, а екстра лесното масло за домаќинство (ЕЛ-1) за 66 денари за литар.
Со одлуката на РКЕ за 0,854 денари за килограм се зголемува и малопродажната цена на мазутот М-1 НС и ќе изнесува 32,987 денари.
Од РКЕ посочуваат дека референтните цени на нафтените деривати на светскиот пазар во споредба со претходната пресметка бележат зголемување кај бензините во просек за 4,109 отсто, кај дизелот за 5,194, кај екстра лесното масло за 4,462 и кај мазутот зза 3,846 отсто.