Видеоснимките покажуваат двајца маскирани полицајци како се приближуваат кон автомобилот во кој се наоѓала Гуд, запрен на улица во Минеаполис. Кога еден од нив ѝ наредил на Гуд да излезе од возилото и ја зграпчил рачката на вратата, возилото накратко почнало да се движи назад, потоа надесно и напред
Во Минеаполис вчера имаше високи тензии, еден ден откако агент на Службата за имиграција и царина (ИЦЕ) уби 37-годишна мајка на три деца во инцидент што го осудија градските и државните службеници кои ги обвинуваат антиимиграциските напори на претседателот Доналд Трамп за хаосот на градските улици.
Околу 1 000 демонстранти вчераутро се собраа пред зградата на федералниот имиграциски суд извикувајќи „срам“ и „убиство“ пред вооружени и маскирани федерални службеници, од кои некои испукаа солзавец кон демонстрантите.
Службениците на администрацијата на државата Минесота и претседателот Трамп понудија сосема различни извештаи за пукањето, во кое неидентификуван агент на ИЦЕ ја застрела американската државјанка Рене Никол Гуд во станбена населба.
Државното истражно биро на Минесота (BCA) вчера соопшти дека првично се согласило да спроведе заедничка истрага за пукањето со федералното биро – ФБИ, но дека федералната агенција се предомислила и ја презела целосната контрола врз него.
Одлуката, според шефот на државната агенција Дру Еванс, значи дека BCA повеќе нема да има пристап до доказите од местото на настанот, како и до други материјали или изјави на сведоци.
„Како резултат на тоа, BCA неволно се повлече од истрагата“,
рече Еванс.
Кит Елисон, генерален обвинител на Минесота, за Си-ен-ен изјави дека одлуката на ФБИ е длабоко загрижувачка и дека државните власти треба да ја спроведат истрагата независно од соработката со федералната влада. Тој додаде дека доказите што ги видел, вклучително и некои што сè уште не се објавени, сугерираат дека е можно федерално обвинение.
Агентот на ИЦЕ беше еден од 2 000 федерални службеници распоредени од администрацијата на Трамп во областа Минеаполис како дел од она што Министерството за внатрешна безбедност (ДХС) го опиша како најголемата операција на ДХС досега.
Службениците на ДХС, вклучувајќи ја и секретарката Кристи Ноем, го бранеа пукањето како чин на самоодбрана и ја обвинија жената дека се обидела да прегази федерални агенти со своето возило, што го нарекоа „домашен тероризам“.
Градоначалникот на Минеаполис, Џејкоб Фреј, го нарече тврдењето глупости и ѓубре врз основа на видеа направени од минувачи кои се чини дека се спротивни на она што го кажува владата.
Видео снимките покажуваат двајца маскирани полицајци како се приближуваат кон автомобилот во кој се наоѓала Гуд, запрен на улица во Минеаполис. Кога еден од нив ѝ наредил на Гуд да излезе од возилото и ја зграпчил рачката на вратата, возилото накратко почнало да се движи назад, потоа надесно и напред.
Трет агент, кој бил пред нејзиниот автомобил лево од неа, извадил пиштол и испукал три истрели додека скокал назад, од кои последниот бил испукан низ отворениот прозорец откако веќе очигледно не бил директно пред возилото.
Сепак, видеото не се чини дека ја покажува Гуд како го удира агентот со возилото, кој останал да стои иако Ноем рече дека бил однесен во болница, а подоцна пуштен. Републиканецот Трамп тврдеше на социјалните мрежи дека жената прегазила службеник на ИЦЕ.
Законот на Минесота им дозволува на полицајците да користат смртоносна сила само ако полицаецот верува дека е потребно да се заштити самиот или другите од непосредна смрт или сериозна повреда. Федералните закони имаат слично правило.
Контрадикторните извештаи за настанот ја нагласуваат политичката поларизација во САД, каде што поддржувачите на Трамп ја прифаќаат неговата верзија на настаните, а противниците истакнуваат дека тврдењата на претседателот честопати можат да се докажат како лажни.
Гувернерот на Минесота, демократот Тим Волц, кој ја повика федералната влада да ги повлече своите службеници, рече дека ја ставил Националната гарда на државата во состојба на готовност. Јавните училишта во градот вчера и денеска се затворени како мерка на претпазливост.
Градскиот совет на Минеаполис, кој ја идентификуваше жената како Гуд, рече дека таа тргнала да им помогне на своите соседи утрото и дека нејзиниот живот бил одземен поради федералната влада.
„Вашингтон пост“ пишува дека Гуд имала 15-годишна ќерка и два сина, на возраст од 12 и шест години.