Студентите ги сведоа сите свои претходни барања до властите на само едно – распишување вонредни парламентарни избори. Сепак, како што стојат работите во моментов, вонредни парламентарни избори властите најавија за следната година
Студентите кои се во блокада денеска организираат акција низ цела Србија под слоганот „Распиши победа“, за време на која ќе собираат потписи за барање за вонредни парламентарни избори. Граѓаните ќе можат да ја поддржат иницијативата во повеќе од сто општини и градови, на речиси 500 штандови.
Списокот на локации, кој редовно се ажурира, е објавен на веб-страницата studenti.org.rs. Според најновите достапни податоци, потписи ќе се собираат на 113 места на 491 штанд. На веб-страницата е објавено и времето кога ќе работат штандовите.
Покрај поголемите градови, како што се Белград, Ниш, Нови Сад и Крагуевац, списокот вклучува и многубројни помали градови од северот до југот во државата.
Денешната акција не е како претходните – нема да има програма, нема да има говори, нема да има официјални обраќања. Идејата, според студентите, е академците подобро да ги запознаат граѓаните, кои ќе можат да остават свои потписи и контакти на штандовите.
„Дојдете и заедно да распишеме! Потпишете ја одлуката! Оставете ни контакт, а ние редовно ќе ви испраќаме известувања за нашите акции и ќе ве водиме како можете да станете активен учесник во оваа борба. Бидете контролор. Учествувајте во подигање на свеста во вашата околина. Од недела продолжуваме заедно“,
порачаа студентите.
Тие наведуваат дека со собирањето потписи сакаат да проценат колку поддршка имаат кај граѓаните и да се подготват за предвремени избори – нивно барање со месеци. Тие ја сметаат акцијата за собирање потписи за распишување избори за пресвртница во активностите на студентското движење.
Студентите ги сведоа сите свои претходни барања до властите на само едно – распишување вонредни парламентарни избори. Сепак, како што стојат работите во моментов, вонредни парламентарни избори властите најавија за следната година.