АД ЕСМ минатата недела преку писмо побара од Владата да прогласи кризна состојба на пазарот со струја поради секојдневните блокади на грчките земјоделци, што ја отежнува доставата на енергенти потребни за производство на електрична енергија и побара од Владата да се користат државните резерви
Владата на денешната седница, на предлог на Управувачкиот комитет за координација и управување со системот за управување со кризи, донесе одлука за постоење кризна состојба во снабдувањето со електричната енергија на целата територија на државата во рок од 7 дена од денот на влегување во сила на оваа одлука, информираат од владината прес-служба.
„Како што информиравме во текот на претходните денови, оваа одлука произлегува поради неможноста за набавка на мазут кој е неопходен во делот на производството. Задолжителните резерви на нафтен дериват ќе се отстапат без надоместок, а АД ЕСМ за трошењето на нафтениот дериват мазут има обврска да доставува извештај до Владата и до Министерство за финансии“,
се наведува во соопштението на Владата.
АД ЕСМ минатата недела преку писмо побара од Владата да прогласи кризна состојба на пазарот со струја поради секојдневните блокади на грчките земјоделци, што ја отежнува доставата на енергенти потребни за производство на електрична енергија и побара од Владата да се користат државните резерви.
Министерката за енергетика, рударство и минерални суровини, Сања Божиновска, вчера информира дека државата има резерви на мазут, кои ќе го снабдат ЕСМ.
„ЕСМ поднесе писмо до Владата, тоа ќе се разгледува утре на владина седница. Утре ќе дискутираме и ќе знаете што ќе се договориме на Влада. Државата има резерви на мазут, со кои ќе може да го снабди ЕСМ. Ако има протести во Грција и повеќе од 30 дена има неможност да се набави мазут, тоа значи дека државните резерви ќе го снабдат ЕСМ“,
рече таа.