Според АНА-МПА, во текот на денот тракторите и земјоделските возила поставени на средината на коловозот ќе бидат тргнати и земјоделците ќе ги паркираат на левата и на десната страна, со што целосно ќе се ослободат сообраќајните ленти и ќе се овозможи непречено минување на товарни возила, туристички автобуси и патнички автомобили
Сообраќајот на граничните премини „Евзони“ и „Ники“ кон нашата земја за влез и за излез од Грција, во следните денови, до петок, ќе се одвива непречено, со оглед на тоа што грчките земјоделци одлучиле привремено, поради Божиќ, да ги стават во мирување блокадите, но тракторите ќе останат паркирани на границите, јавува грчката новинска агенција АНА-МПА.
На граничниот премин „Евзони“ („Богородица“) земјоделскиот блок со над 300 трактори беше поставен на 1 декември, а сообраќајот секојдневно се блокираше на неколку часа, првично претпладне и попладне, а во изминатиот период само во попладневните часови.
Според АНА-МПА, во текот на денот тракторите и земјоделските возила поставени на средината на коловозот ќе бидат тргнати и земјоделците ќе ги паркираат на левата и на десната страна, со што целосно ќе се ослободат сообраќајните ленти и ќе се овозможи непречено минување на товарни возила, туристички автобуси и патнички автомобили.
Сепак, земјоделците ќе останат и планираат таму да ги поминат празниците, но без да се попречува нормалното одвивање на сообраќајот.
Слична е ситуацијата и на „Ники“ („Меџитлија“), каде што земјоделците одлучиле до петок да не го блокираат сообраќајот.
Од друга страна, остануваат, барем во текот на денешниот ден, блокадите на граничните премини „Промахонас“ и „Ексохи“ кон Бугарија, но само за товарни возила.
Во однос на блокадите низ цела Грција, целта на земјоделците во пресрет на Божиќ е да ги отворат автопатиштата за граѓаните непречено да стигнат до нивните дестинации, но без притоа да ги повлечат целосно тракторите.
Нивниот план е тракторите да останат паркирани на крајот на автопатиштата, за што полицијата смета дека не е безбедно на таков начин да се одвива сообраќајот.